Las Fritas Insomesas a l’ombra del drapèu palestinian

Quand l’ultra-esquèrra bota lo fuòc a Tolosa en sosten als preneires d’ostatges

            Dins la banlèga Èst de Tolosa se tròba la comuna pichona de Montrabe qu’aculhís una populacion de sonque 4 000 estatjants. De costuma s’i passa pas grand causa. L’endrech es conegut per èsser tranquil. Es una banlèga pavalhonariá ont generalament fa bon viure. A Montarbe coma endacòm mai « s’i passava pas res fins a que s’i passe quicòm ». E aquel quicòm es l’incendi que, dins la nuèit del 7 al 8 d’abrial d’ongan destrusiguèt un Mc Donald’s en òbra.

            Cal pas comptar sus ieu per me far l’avocat dels chapalèus, coma los apelava tan plan e tan judiciosament lo Paure Cristian Laus. Sens èsser un fin gastronòm nimai un górjafin de primièra, per manjar tan m’estimi prene mon temps dins un luòc deslassant e agradiu. Res que de dintrar dins un Mc Donald’s, urosament m’arribèt pas que dos o tres còps dins ma vida, a niflar aquela pudesina de ketchup n’ai l’estomac que se me lèva a me’n far venir lo vòmit. Totes los gostes son cèrtas dins la natura, e o planhissi pas, mas personalament felicitarai pas lo qu’inventèt aquel tomatat a l’encòp sucrat e picant. Jogariá qu’aqueste es pas occitan e qu’es pas estat noirit al cassolet o a l’aligòt.

Pel procuraire de la Republica de Tolosa i a pas cap de mistèri : « las investigacions tecnicas realizadas permeton de considerar que l'incendi de l'obrador del restaurant es d'origina criminala ». Faguèt dobrir una enquista amb incriminacion de destruccion en banda organizada del ben dels autres amb de mejans perilhoses per las personas. Se los colpables son arrestats son passibles de 20 annadas de reclusion criminala. Urosament a Montrabe i agèt pas cap de nafrat.

            Se los enquistaires son en cèrca d’una banda, es pas per azard. Es que l’incendi es estat revindicat per un grope fins alara inconegut, mas ça que la reconeissable, batejat « Las fritas insomesas ». Podèm pas, evidentament far pas lo parallèl entre « La França insomesa » e aquestas « Fritas insomesas ». D’autant mai que l’acte de destruccion es estat revindicat per un comunicat de premsa dins lo qual se pòt legir que lo fuòc es estat alucat «en sosten al pòble palestinian». Qualques parents d’escolans e de ribairencs avián peticionat contra aquela dobèrtura de chapalèu en causa de sa proximitat amb lo collègi de la vila. Crentavan una aumentacion dels problèmas ligats a l'obesitat en çò dels joves mas tanben d'impactes negatius sus la qualitat de vida, soslinhant qu'existís ja quatre manjalèus similars dins un rai de cinc o sièis quilomètres a l'entorn de la comuna.

            D’aquelas consideracions de mala manglisca, semblariá de las Fritas insomesas se’n trachèsson coma de lors primièras babochas. Çò que los obsedís mai es que la firma Mc Donald’s es estasuniana e que los Estats-Units ajudan l’Estat d’Israèl a s’aparar de l’imperialisme arab. Aquesta agression menada per l’intermediari d’organizacions islamo-terroristas fanatizadas coma lo Hezbollah al Nòrd e lo Hamas al Sud. Organizacions pagadas e armadas a còps de petrodolars (lo petròli se negocia generalament en dolars).

            La França insomesa coma sa sorreta de circonstància las Fritas insomesas corron, conscientament o inconscientament, per los Fraires musulmans. Son los ravits colhonats de l’islamisme. Alavetz, se trachan pas de santat publica, mas plan de far avançar la propaganda islamica. Çò que repròchan a Mc Donald's, non es sa mangiscla (que d’unes pòdon jutjar saborosa o immanjabla), mas d’aver noirit a gratís e pendent qualques jorns los militars, la polícia, los secoristas e los espitals israelians aprèp l’òrre chaple del 7 d’octobre de 2023 que faguèt, remembram-o, 1200 mòrts e 251 ostatges que d'unes son encara detenguts pels terroristas musulmans.

            Que, malgrat lor biais de cosinar plan singular, los restaurants Mc Donald's crompèsson lors ingredients localament e atal faguèsson trabalhar l’agricultura locala coma o fan generalament totes los autres restaurants gastronomics o pas, d’aquò las Fritas insomesas se’n trufan completament. Son aquí per condemnar la quita existéncia de l’Estat d’Israèl e totes los que lo sostenon. Per far plaser a lors amics moametans las dichas Fritas insomesas metèron lo fuòc a l’establiment en via d’acabament. E se la direcion del Mc Donald’s de Monrabe aviá previst de servir d’hamborgueses « a l’alh », auriá pas res cambiat a la causa.

            Sus l’obrador de l’A 69 los Insomeses botèron fuòc a de veituras e a de material de terrassament e agressèron fisicament d’obrièrs a l’ombra del drapèu palestinian. Pendent lors manifèstacions s’ausisson d’eslogans antisemitas jos colors palestinianas. A Montrabe meton lo fuòc a un restaurant en construccion en sosten a de terroristas que detenon encara d’ostatges. Prene d’ostatges e un dels pièger crimis qu’un uman pòsca far a un autre uman, mas d’aquò los Insomeses fa plan temps que son pas mai capables de n’aver consciéncia. Al nom de lor ideologia an perdut tota nocion d’umanitat. Vergonha a n’eles !

               Sèrgi Viaule