Del drech a l’existéncia per l’Estat d’Israèl

            Dempuèi lo pogròm del 7 d’octobre de 2023 perpetrat, o cal ben tornar dire, contra una molonada de festaires per los terroristas arabomusulmans de l’Hamàs, una èrsa d’antisemitisme a submergit la planeta. Alavetz, me sembla caporal e indispensable de remembrar que la guèrra dins la faissa de Gazà es estada declarada pels islamoterroristas al moment d’aqueste òrre chaple. Mas ara que la guèrra seguís son temps, los supletius de l’organizacion faissista dels Fraires musulmans dins lo monde, en Euròpa, en França e quitament malurosament en Occitània, contunhan de sosténer lo terrorisme islamic puslèu que la democracia israeliana. E per aquò an pas paur de delargar un fum de messorgas. D’aquel punt de vista se descreditan cada jorn un pauc mai.

            A l’origina de la guèrra i agèt lo massacre comés per los islamo-terroristas del Hamàs que, sul territòri israélian, faguèt 1 200 mòrts,7500 nafrats. Demest los mòrts, d’enfants foguèron massacrats. Un nenon foguèt despeçat viu a còps de pala. Lo chaple foguèt d’una salvatjariá indicibla, mas aquò los defensors dels terroristas islamistas fan mina d’o aver oblidat. A créire qu’an la memòria selectiva ! 250 personas son estadas presas en ostatge. Remembri als partidaris de la charià, i comprés als Occitans que prenon lors babochas, qu’es lo pièger dels crimis. Es un chantatge odiós sus la vida de civils. Es la quiti esséncia de la terror e de l’inumanitat. Mas d’aquò los supòsts de l’islamo-terrorisme se’n chautan. Lor antisemitisme, lor asirança lor leva tota umanitat. A créire tornamai qu’an la compassion selectiva : los unes an lo drech de massacrar, mas las victimas aurián pas lo drech de se defendre contra l’innomenable. Del drech a l’existéncia per l’Estat democratic d’Israèl, los turiferaris del faissisme islamic se’n chautan. Son obnubilats per lor asirança del josiu.

            Aquela somission (« islam » significa somission) a la terror islamica los priva de tota objectivitat e sens critic. Aqueles lausengièrs dels terroristas del Hamàs refusan de veire que :

- L’armada israeliana, abans de tustar una cibla de l’Hamàs dins la faissa de Gazà, avertís la populacion per que quitèsse l’endrech ciblat. Aquel avertiment de la populacion civila permet, evidentament, als terroristas de quitar eles tanben l’airal afustat. Çò que nòs a l’eficacitat de l’accion militara israeliana. Mas es a n’aquel prètz que l’armada israeliana procedís per estalviar al mai que se pòsca las victimas innocentas. E se i a de victimas civilas -e malurosament n’i a- es sovent per çò qu’an servit de bloquièr uman als assassins del Hamàs. Totòm sap que los terroristas se van amagar darrèr los civils dins los espitals, las escòlas, las mosquèas (i a 400 mosquèas en Israèl mas pas una sola sinagòga a Gazà siá dich de passa), etc…

- Los islamo-esquerristas cridan a la carestiá e malafam dins la faissa de Gazà. Acusan plan solide Israèl de n’èsser responsable. La vertat vertadièra es que d’ara enlà Israèl a condreitament decidit de distribuir el-meteis l’ajuda alimentària a la populacion civila de Gazà. Fin ara los tregins umanitaris èra desviats pels terroristas a lor profièch. La noiridura èra panada per l’Hamàs. Es normal qu’Israèl faga lo necessari perfin que l’enemic se servisca pas sus l’esquina de las populacions civilas.

- Justament a prepaus de «populacion civila» quin es lo degrà de complicitat d’aquesta amb los assassins de l’Hamàs. Es una question que los esquerro-islamistas europèus e occitans se pausan pas jamai. Se son pas encara mainats qu’un assassin palestinian sembla a s’i enganar a un civil. Es pr’aquò evident que sens la complicitat de la populacion civila i a temps que l’Hamàs seriá eradicat e la patz seriá tornada dins la faissa de Gazà.

- Los turiferaris dels assassins difusan de messorgas a bodre. Entre mila ne vòli per pròva que dison de longa que i a la famina a Gazà, mas que fraita d’aver de personas descarnadas a metre davant las camèras son anats filmar un paure adolescent qu’aviá pas que la carn suls òsses. Aprèp enquista, las gents senadas se son mainadas que se trachava d’un malurós dròlle tocat de la mucoviscidòsi. Cercatz l’error, mas subretot cercatz la marrida fe e l’engana.

            Lo cimèl de l’ignomia es quand aqueles propagandistas acusan Israèl de genocidi. Acusar Israèl de genocidi es la pus immonda agression a la dignitat umana que se pòsca far. M’atardarai pas sus aquela atencha a l’intelligéncia e a la dignitat umanas. Que de monde que se dison occitanistas s’abaissèsson a se far los relaisses d’una tala propaganda me fa dòl. Que d’occitanistas ajan pro d'ulhièras per aver publicat fa gaire un article de sosten a Palestina sus lor blòg en doblidant a bèl expressi de condamnar l’assassinat dos jorns abans d’un coble de joves josius davant un musèu de Washington m’atrista prigondament. S’apelavan Yaron Lischinsky et Sarah Milgrim. Es vertat que sortissián d’un musèu josiu e aquò es insuportable per los pro-palestinians. Remembri que 1676 actes antisemitas son estat repertoriats en 2023 contra 436 en 2022. Meteissa causa en 2024 ont 1570 actes antisemitas foguèron comeses. Ieu que m’esperfòrci d’aparar las valors de larguesa, convivéncia e paratge, quand vesi d’occitanistas venir complicis de l’islamo-esquerrisme, aquò me desòla, emai se la causa es malurosament pas novèla jol cèl occitan.

            Los Israelians an pas vocacion a se daissar escotelar, massacrar, chaplar sens reagir. An conegut un genocidi e an pas condreitament enveja de ne conéisser un autre, tant mai qu’aqueste poiriá plan èsser lo darrièr se no’n tenem a l’òdi desvolopada per lors enemics musulmans.

Òc-ben, amb lo Partit de la Nacion Occitana, sosteni l’existéncia de l’Estat democratic d’Israèl. Un Estat qu’a lo drech de s’aparar contra la cotria de sos vesins arabo-islamistas imperialistas. Cridi ma solidaritat amb Israèl, lo sol Estat democratic de l’Orient-Mejan, sosteni e signi :

                                                                                                         Sèrgi Viaule