Overblog
Editer l'article Suivre ce blog Administration + Créer mon blog

Un obratge de vulgarizacion tocant a l’istòria de la nacion berbèra

Bernard Lugan es istorian. Faguèt d’estudis d’istòria e presentèt mantunas tèsis universitàrias. Amb aquò intervenguèt un temps al Collègi Interarmadas de defensa e tanben a l’Institut dels Nauts Estudis de Defensa Nacionala per lo qual assegurava un ensenhament en « istòria e geoestrategia de la francofonia ». Aquel istorian sembla un personatge singular dins lo cortal universitari francés. Publica fòrça, mai que mai de libres de vulgarizacion, mas curiosament o fa a compte d’autor. A creat son ostal d’edicion pròpri per se poder publicar. Un cas rarissim dins lo paisatge intellectual francés. Cossí que ne vire, es un especialista de l’istòria de l’Africa. Es un estacanovista dins son domèni. En meteis temps que publica fòrces obratges, publica tanben una revista electronica mesadièra « l’Afrique réelle ».

Lo títol del libre atrasèt mos vistons : « Histoire des Berbères / Istòria dels Berbèrs ». Rai que lo libre siá pas un libre de cercaire vertadièr, vòli parlar aquí dels istorians que van quèrre la matièra a las sorgas. Emai s’es un resumit d’obratges ja publicats a travèrs los sègles, Bernard Lugan a l’art del condensat. A l’engèni de la sintèsi e lo biais d’anar a l’essencial. Per o plan dire sap alestir un obratge de vulgarizacion istorica. Aqueste « Histoire des Berbères / Itòria dels Berbèrs » ne pòrta pròva un còp de mai. Se Bernard Lugan mena pas verdadièrament d’investigacions istoricas, per contre es un excellent bibliograf. D’un sicut donat es capable -de çò que ne pòdi jutjar- d’anar desboscar l’exaustivitat de çò qu’es es estat escrich. Partent d’aquí ne sap tirar tot lo melhor de la saba.

Un colonialista, foguèsse estat colonizat un moment donat, demòra un colonialista. E dels colonialistas, ne cal pas tirar un per ne metre un autre. L’arabo-musulman argerian (contra la nacion berbèra) val lo Turc (contra la nacion curda), lo Chinés (contra la nacion tibetana), lo Francés (contra las nacions bretona, occitana, còrsa, canaca, etc…), e la lista poiriá èsser longa. Atal Bernard Lugan balha l’exemple de la revista arabo-musulmana Maghrib que dins las annadas just aprèp l’independéncia del país publiquèt un article dins lo qual es escrich que « Los Berbèrs aguent pas de genealogia pòdon accedir al paradís pas que se se restacan a d’unas linhadas arabas ». Se lo paradís èra grand dobèrt als imbecils e als criminals, solide que los supremacistas arabo-musulmans aurián pas besonh de fusadas per i pujar ! Aquò demòstra tristament que lo colonizat d’aièr pòt venir lo colonialista d’uèi. Per prene pas qu’un exemple, lo d’aqueste ministre argerian de l’educacion nacionala que declarèt en 1962, doncas al lendeman de l’independéncia e alara que los Berbèrs demandavan un Estat confederal, que « Los Berbèrs son una invencion dels Paires Blancs ». Quand la marrida fe o disputa a la bestiesa n’arriban a n’aquelas aberracions. Cossí tornar aquel monde a la rason e a la realitat ? Se sabon pro fòrt militarament per se poder permetre aqueles mesprèses. Cercan la confrontacion violenta. Dins aqueles cases, la cèrca pacifica de justícia patís la violéncia brutala del poder colonizator.

Dins aquel libre, l’autor denóncia condreitament lo colonialisme arabo-musulman en Africa del Nòrd. Camin fasent utilisa perfiechament e a bon èime lo concepte fontanian d’etnia e d’etnisme. Regretam ça que la que fins ara aja pas escrich d’obratges coma una « Istòria dels Occitans » ont se denonçariá l’imperialisme francés coma se denóncia l’imperialisme arabo-musulman. Dins aquel domèni coma dins los autres caldriá pas far doas mesuras d’una meteissa cana. Vertat Sr Lugan ?

Pasmens, a prepaus de la revòlta berbèra de 1871 es obligat de constatr que « Dins los represalhas, los Franceses aguèron la « man pesuga » (notarètz l’eufemisme suspècte de l’autor) : condemnacions a mòrt, desportacions en Canaquia, impòstes de guèrra, confiscacion de tèrras, destrusidas de recòltas e de vilatges, etc… ».

Coma o a plan demostrat dins sas òbras teoricas Francés Fontan, la lenga es l’element determinant de la nacion. Es la rason per la quala es lo primièr signe distintiu de la nacion oprimida que combatan totes los imperialistas de la planeta. Tre l’endeman de l’independéncia en Argeria, la cadièra de lenga berbèra es suprimida a l’universitat. Al Marròc, un pauc abans, foguèt la meteissa causa : « Alavetz, l’ensenhament del berbèr desapareguèt amb la supression, tre 1956, de la cadièra de berbèr de l’Institut dels Nauts Estudis Marroquins de Rabat ».

La leiçon que se poiriá tirar d’aqueste libre, se leiçon i a ne tirar, es que çò que perdèt los Berbèrs dins los temps ancians, aquò’s lor division en tribús. Mas es gaire rasonable de lor far aquel procés que dins los tempses ancians, fòrces pòbles foncionavan en tribús.

         Bernard Lugan concep pas l’istòria sens l’apevar sus de representacions geograficas. Doblidessem pas qu’es un especialista en geopolitica. Es atal que dins aquel obratge, coma dins los que legiguèri precedentament, se tròban un fum de mapas. Caduna permet de visualizar una situacion istorica a un moment donat. Son plan utilas per seguir lo debanament e l’evolucion dels eveniments. Amb aquò, l’autor illustra tanben sos prepauses amb de documents fotografics. Aquestes, ça que la plan mens indispensables que las mapas, nosan pas ges al tèxte.

  Pèire Rabasse

 « Histoire des Berbères » de Bernard Lugan. Edicions Bernard Lugan.

Despaus legal : quatren trimèstre de 2018. 204 paginas.

http://www.librairiefrancaise.fr/fr/afrique/5910-histoire-des-berberes-des-origines-a-nos-jours-bernard-lugan.html

 Histoire des Berbères de Bernard Lugan

 Histoire des Berbères de Bernard Lugan

Tag(s) : #Pèire Rabasse, #Tot en Oc
Partager cet article
Repost0
Pour être informé des derniers articles, inscrivez vous :