« Comté de Toulouse : l’éradication ! » de Jòrdi Laboissa

    Jòrdi Laboissa es un istorian fòra las arpas del parisianisme. Me demandi s’es encara necite de presentar aquel militant a un lectorat occitan ? D’el, avèm ja presentat dins Lo Lugarn e dins aquesta meteissa cronica « Occitania : moments d’histoire » e « Femmes d’Òc ». Pasmens me sembla judiciós de picar mai sul clavèl.
    Jòrdi Laboissa aviá pas encara acabat sos estudis que ja, lo professor Gustau Farenc l’aviá iniciat a l’arqueologia e a l’occitanisme. De tot temps foguèt afogat d’istòria. Sap que los pòbles son lo produch de lor istòria. Un pòble que coneissariá pas son istòria seriá un pòble sens existéncia, sens identitat pròpria. Es la rason per la quala Jòrdi Laboissa, en parallèl d’una carrièra d’ensenhaire e de musician popular, de longa menèt de recèrcas istoricas en bibliotèca coma sul terren. Fa ara mai de cinquanta ans qu’escriu d’articles de vulgarizacion sus l’istòria e la preistòria occitanas. Aquò comencèt amb la revista Infòc que ne foguèt cap-redactor pendent de decennias, puèi la publicacion regulara de brocaduras e libres. Aquestes son a cada còp tras que plan recebuts pel public. Las gents son demandairas de lor istòria occitana. Una istòria que de tot temps lor es estada amagada pels manuals escolars e Jòrdi Laboissa es plan plaçat per o aver totjorn sabut.
    En decembre de 2024 espeliguèt « Comté de Toulouse : l’éradication ! ». L’istorian nòstre i va pas per quatre camins e a pas paur de dire de blanc, çò blanc. D’alhors, un istorian seriós e onèste a pas a s’autocensurar. I a pas que los istorians parisencs o aparisenquits qu’an per dever de dintrar per fòrça dins lo roman imperial francimand e d’i demorar se vòlon contunhar d’èsser publicats e reconeguts. Jòrdi Laboissa, el, a pas a passar per aquel mòtle. Demòra un intellectual onèsta e intègre qu’a pas res a demandar ni esperar de l’istorigrafia oficiala e obligatòria francimanda. Lo sotatítol de son libre es sens ambigüitat : « De la croisade à la colonisation ». Tan val dire las causas coma son. De notar que lo present obratge es dedicat a « Totas las victimas d’injustícias e secutaments politics e religioses ». Vertat que se la glèisa catolica es ara, enfin, venguda non-violenta ; Occitània es d’uèi confrontada a l’islam qu’assassina a doble rebraç (Marselha, Tolosa, Montalban, Carcassona, Trebes, Niça, Rumans, etc…). Paures de nautres qu’aprèp aver patit l’intolerància catolica enduram d’uèi lo fanatisme murtrièr musulman.
    Aqueste libre resumís l’invasion de Lengadòc e una part de Provença coma de Gasconha per las armadas francesas comandadas per lo sanguinari e abramat Simon de Montfòrt. Jòrdi Laboissa o fa en qualques capítols plan engimbrats. A cada còp lo resumit va a l’essencial. En qualques paginas tot es al punt e i manca pas res d’essencial. En bon pedagòg, l’autor a lo biais d’alestir cada pontanada d’aquela funèsta guèrra d’envasiment : « Las originas del conflicte - L’invasion - La resisténcia occitana - L’inquisicion - La traïson de Sicre - etc… ».
    Lo darrièr capítol es consacrat a Bernat Deliciós, aquel monge franciscan que menèt a la debuta del sègle XIVen un combat contra l’inquisicion que contunhava de condemnar a bèl èime a Carcassona. Jòrdi Laboissa lo ditz « combatent de la libertat », emai es vertat que l’òme lucharà per la jutícia fins a son darrièr buf. Un ultim ranguilh que li sortirà de la garganta alara que se tròba al fons d’una preson. Vertat que s’afrontava pas l’inquisicion sens consequéncias. Lo meriti de los que menavan aquela contèsta n’èra d’ont mai grand. E l’autor de clavar aquel capítol per aquelas doas frasas : « Atal, Bernat Deliciós rendrà l’anma pendent las fèstas de Pascas de l’an 1320, siá dètz ans aprèp la mòrt de Pèire Autièr « l’Ancian » de la darrièra glèisa catara del Tolosan e del Carcin-Bas. D’efièch, pugèt sul lenhièr de Tolosa lo 10 d’abrial de 1310 ».
    Aquel libre deuriá èsser utilizat coma manual d’istòria dins totas las classas de sièisena en Occitània tota. Es atal que se passariá se los Occitans èran capables de far respectar lors dreches a l’autodeterminacion politica e s’avián en man l’alestiment dels programas escolars per las escòlas del país. Aquel obratge deuriá èsser tanben balhat a tota persona que ven viure en Occitània. Quand se ven viure dins un país, tan val ne conéisser l’istòria. Aquel libre compliriá a plec aquel besonh d’enrasigament.
Çò qu’en general fa l’especificitat dels libres publicats per Jòrdi Laboissa son los documents iconografics qu’i enclau. Son nombroses e principalament en color. L’autor dispausa d’un fons important que li permet de plaçar l’illustracion aquí ont cal e al moment que cal. Es, d’efièch, lo quiti autor qu’assegura la mesa en paginas e la difusion de sos obratges. Jol jo francimand la libertat es a n’aquel prètz : Los que vòlon pas marchar al pas del gal, son despietadosament ostracisats.
Atanben, lo libre se pòt crompar quasi unicament en lo comandant a l’autor a l’adreiça postala seguenta :
Infòc Occitania
98, avenguda de l’Espinet
31 400 Tolosa
Tel : 06 34 95 22 12
Adreiça Internet : occitania.infoc@orange.fr 

        Pèire Rabasse

    « Comté de Toulouse : l’éradication ! » de Jòrdi Laboissa. Edicions « Infòc - Occitania ». Acabat d’imprimir en decembre de 2024. 120 paginas.
https://www.coollibri.com/bibliotheque-en-ligne/georges-labouysse/comte-de-toulouse-leradication-_994510