Overblog
Editer l'article Suivre ce blog Administration + Créer mon blog

Encara e totjorn de morfina per la lenga occitana

Un comunicat de premsa de l’Ofici Public de la Lenga Occitana recebut lo diluns 7 de decembre de 2020, m’anóncia que de nòvas Convencions Academicas venon d'èsser signadas entre la Region Centroccitània e las acadèmias de Tolosa e Montpelhièr, amb la participacion de l’Ofici Public de la Lenga Occitana. Aquelas convencions preveson subretot :

- d’augmentar de 26 del cent los efectius d’escolans bilingües ;

- de renfortir la continuïtat dels cursus de formacion ;

- de facilitar lo dialòg entre los servicis de l'Educacion nacionala, las collectivitats e los operators associatius ;

- de se balhar de mejans per far créisser d’un biais duradís lo nombre d’ensenhaires d’aquí a 2022.

Lo comunicat ajusta que los signataris d'aquelas convencions « espèran de conjugar lors esfòrces per sosténer e espandir l'ensenhament de l'occitan dins los territòris concernits, amb una atencion tota particulara portada als publics e territòris mai fragils ». Notarètz amb ieu que tot aquel monde « espèran » conjugar lors esfòrces. Nos avertisson que son pas solides de res. Que tanplan auràn pas léser de « conjugar lors esfòrces » o alara qu’auràn quitament pas l’enveja d’o far. Tan val dire que reconeisson de tira que l’occitan es la darrièra de lors preocupacions e que çò signat, -se quicòm es estat signat-, los obliga pas a res per en cas que lor "esperança" se realizariá pas. Un còp de mai lo mesprètz que nos adreiçan es absolut.

Lo comunicat ajusta : « Lo creissement de la ressorsa ensenhanta qualificada en occitan es un dels aisses de trabalh prioritaris cercant aquel desvolopament. Aquelas convencions completan las politicas transversalas e intersectorialas menadas per las collectivitats territorialas en favor de l'occitan dins l'encastre de las competéncias definidas pel còdi general de las collectivitats territorialas en vigor. S'agiguèt en particular de crear un environament sociolingüistic favorable al dintre dels territòris ». Se pòt dire que se se realiza, serà una politica dels passes pichons. Quand òm coneis l’estat de la situacion sociolingüistica, augmentar de 26 del cent los efectius d’escolans bilingües, es balhar de morfina a un morent. Las chifras dels escolans que recebián un ensenhament pauc o pro consequent d’occitan en 2013 èra de 62 000. Me desencurarètz de vos balhar pas una chifra mai recenta, mas coma o escriu Lo Congrès sus son sitenet : « Aquò pòt estonar, mas las chifras de l’ensenhament de l’occitan son gaire fisablas en França ». Qual se n’estonariá a despart del Congrès ? Aquela opacitat e aquela negligéncia quadran plan amb la politica lingüicista mesa en placa e complida per l’imperialisme francés en Occitània dempuèi mai de dos sègles. Mas semblariá que i aja pas mai dins lo país que lo Partit de la Nacion Occitana per se’n mainar e per o denonciar.

            Per ne tornar a n’aquelas famosas convencions (remarcarètz lo plural probablament per far creire que trabalhan fòrça per salvar l’occitan), anonciadas per l’OPLO, ai pas saput trobar sus son sitenet un ligam que m’auriá pogut endralhar cap als tèxtes anonciats. Ai pas pogut montar fins a la sorga. Ai plan cercat en notant sus l’espaci dedicat a las recèrcas « Tèxte de las Convencions signadas entre lo Conselh Regional de Centroccitània e las acadèmias » (en occitan mas tanben en francés) e aguèri pas cap de responsa. Oblit o volontat politica de mostrar pas los miserables contenguts d’aquelas convencions ? Plan solide an aquel nivèl se pòt trachar pas que d’una volontat politica. Aquel monde, politicians e naut-foncionaris al servici de l’imperialisme francés sabon ben pro que las questions sociolingüisticas son de questions de politicas nacionalas. Son pas sens saber qu’escafar l’identitat d’una nacion es la far desaparéisser. Atanben, lor trabalh es de far creire que fan quicòm per la lenga. La mantenon en bassa tension, just per balhar un pauc de coloracion singulara a la Region. D’alhors, aquò marcha quand vesèm Patric Roux, conselhièr regional e vici-president de l’Ofici Public de la Lenga Occitana, seguir. O fa, siá coma complici, siá coma rabit de servici. Que cadun se faga son opinion…

            Trobant pas los tèxtes integrals d’aquestas Convencions sul sitenet de l’OPLO me diguèri qu’èran probablament sus lo del Conselh Regional de Centroccitània. Que non pas ! Sus aqueste tanben l’anóncia es portada trionfalament « La lenga occitana fa partida del patrimòni regional nòstre ! En partenariat amb l’Ofici Public de la Lenga Occitana e las acadèmias de Montpelhièr e de Tolosa, d’unas convencions novèlas venon d’èsser signadas per son ensenhament. An per objectiu d’augmentar lo nombre d’escolans que parlan occitan e de far créisser lo nombre dels futurs ensenhaires ». Mas per çò qu’es del contengut precís d’aqueles tèxtes, n’ai pas trobat ges. Disi pas qu’i son pas, mas se i son, son fòrça, fòrça, fòrça plan amagats. Talament plan qu’un quidam coma ieu, ni mai ni mens desgordit qu’un autre, los pòt pas desboscar. Aquò tanpauc pòt pas èsser un azard. En admetent que i foguèsson, es per volontat politica que son amagats. Sul site del Conselh Regional s’i tròba ben lo tèxte integral de la Convencion-quadre pel desvolopament e l’estructuracion de l’ensenhament contribuïssent a la transmission de l’occitan dins las acadèmias de Bordèu, Lemòtges, Montpelhièr, Peitius e Tolosa per las annadas 2017-2022, mas aqueste es estat signat a Tolosa lo 26 de genièr de 2017. Res d’actual… Segurament que pels elegits sucursalistas de tota mena, l’occitan es totjorn pas d’actualitat.

Nimai se la Presidenta Caròla Delgà ditz que « Promòure l’ensenhament de las lengas regionalas es una necessitat », i pas que Patric Roux per la creire. En bon soldat, de la politica d’assimilacion, l’elegit del partit regionalista « Partit Occitan » escriu : « Per las annadas venentas, aquestas convencions son essencialas per assegurar la transmission de la lenga occitana dins las acadèmias de Tolosa e Montpelhièr. Engatjan los partenaris a conjugar lors esfòrces per i renfortir d’un biais duradís l’ensenhament de l’occitan en fixant d’objectius precises e de mejans a alogar. Concretament, garantisson la continüitat dels percors, de la mairala al licèu, tot comprenent una part dedicada a la formacion dels ensenhaires e solidifican totas las filièras, notadament publicas e Calandretas ». Siá lo paure el confond las micas amb lo cantèl, siá a vendut son anma al diable se jamai aguèt un jorn l’anma occitana.

Ni per tot, ai totjorn pas pogut aver lo contengut d’aquelas famosas convencions. Alavetz, anèri sul sitenet de l’acadèmias de Tolosa. Dins l’espaci « dintratz la vòstra recèrca aicí » mencionèri « Convencion per l’ensenhament de l’occitan » (en francés, plan solide), mas la responsa triguèt pas : « Avèm pas trobat cap de resulta ». Cèrca que cercaràs, vira que viraràs, res ! L’omertà totala !

Una omertà que sembla acontentar los occitanistas. Pr’aquò se las questions sociolingüisticas pòdon èsser de questions culturalas e patrimonialas occitanas, son abans tota causa de questions politicas. La subrevida de la lenga es la subrevida de la nacion !

Apondon de darrièra minuta : Coma s’aviá ausit ma repotegada, lo divendres 11 de decembre de 2020, l’OPLO tòrna mandar una Letra publica e enfin, aqueste còp, publica los tèxtes de las convencions (una per caduna de las acadèmias de Tolosa e Montpelhièr). Atal, cada ciutadan pòt ara jutjar de lor contengut ; la transparéncia èssent la mendre de las causas en democracia.

 Sèrgi Viaule

Ofici Public de la Lenga Occitana
Tag(s) : #Sèrgi-Viaule, #Tot en Oc, #Tribune libre
Partager cet article
Repost0
Pour être informé des derniers articles, inscrivez vous :