Overblog
Editer l'article Suivre ce blog Administration + Créer mon blog

Éditorial en occitan, graphie mistralienne, du N°136 de la revue Lo Lugarn.
Pandemìo, autouritarisme e emperialismes

Despièi bèn lèu un an d’acò, lou mounde entié enduro lou flèu de la pandemìo que li dison Covid-19 e li chifro di malaut e di mort countùnion d’aumenta. Lis estrategìo messo en plaço pèr n’acaba em’ elo soun estado diferènto segound li païs e mai o mens eficaço. Pres à l’imprevisto coume tóuti lis autre, l’Estat francés a biaiseja dins sa gestioun de la criso sanitàri. Acò es pas uno souspresso pèr lou Partit de la Nacioun Óucitano. L’Estat francés, emperialisto pèr definicioun, a reagi de maniero autouritàri e jacoubino en prenènt, despièi Paris, tóuti li decisioun impourtanto sènso counsulta vo quàsi pas lis eisecutiéu di regioun, di despartamen e di coumuno. Li prefèt, dins soun role de subre-pouliçoun dóu gouvèr, soun esta soulet encarga de li faire aplica sus lou terren. Pèr quant i voues dissidènto demié li mège pratician coume aquelo de l’infecioulogue marsihés Deidié Raoult, qualificado de coumploutisto, soun pas estado entendudo pèr lou tout-pouderous e mai-que-mai parisen Counsèu scientifi Covid-19, qu’es uno meno d’Estat dins l’Estat.

Rèn de nòu souto lou soulèu e lou mesprès de la sanflourado parisenco pèr ço qu’apèlon emé desden la « prouvinço » countùnio. Aquelo « prouvinço » es pas fisablo ; d’aqui la severita di dous estremage (li « counfinamen »), l’absurdeta de cèrtis interdicioun e l’impousicioun d’atestacioun de desplaçamen derougatòri, que recordon quaucarèn à-n-aquéli que couneiguèron l’óucupacioun e que fuguèron adóutado pèr quàsi ges d’autre païs.

Fins à quau poun l’autouritarisme dóu gouvèr e l’enfantoulimen di ciéutadan poudran ana, avans de prouvouca uno revòuto dis atour de la vido ecounoumico e culturalo e de quau que siegue, tóuti pulèu doucile fin-qu’aro ?

E sènso nega la graveta dóu virus, de que dire dóu martelage de cervèu sóuvertous qu’avèn pati de la part di media ?

Lou Partit de la Nacioun Óucitano, qu’es pas coumpetènt en epidemioulougìo e fai pas lou dounaire de leiçoun, pènso pamens qu’uno gestioun decentralisado de la criso sanitàri, coume en Alemagno, sarié estado belèu mai eficaço.

Pandemìo vo noun, la situacioun internaciounalo a de que faire tira soucit e, d’en proumié, encò de nòsti vesin de l’Estat espagnòu. Lou Partit de la Nacioun Óucitano se demando se l’Espagno dèu èstre counsiderado coume un païs demoucrati, estènt l’atitudo de soun eisecutiéu e de sa justiço raport à l’independentisme catalan. Fa mai d’un milié de jour que de beilejaire independentisto catalan soun esta coundana à de peno grèvo, embarra vo fourça de s’eisila pèr delit d’óupinioun. Pèr lou gouvèr espagnòu de gaucho, la criso sanitàri es estado uno escasènço requisto pèr priva lis autounoumìo de si poudé. La justiço espagnolo es clafido de juge qu’an lou làngui dóu franquisme, tant coume l’armado.

L’óupinioun publico espagnolo es tras que majamen catalanoufobo e bascoufobo. Lou Reiaume d’Espagno es belèu un païs demoucrati pèr l’Unioun éuroupenco, mai pas pèr tóuti sis abitant : l’Espagno es uno vergougno pèr l’Éuropo.

Pièi, lis escorno prejitado pèr lou beilejaire de Turquìo, l’emperialisto e islamisto Erdoğan, au contro dóu presidènt de la Republico franceso – coupable, à soun vejaire, d’estimatisa li musulman de l’Estat francés – counfiermon pèr lou Partit de la Nacioun Óucitano que l’emperialisme turc, coustant dins l’istòri d’aquéu païs, es sèmpre tant verinous.

Pensan i tentativo d’espandimen de l’Empèri óutouman en Éuropo óurientalo, i tres genoucide dis Assirian vo Aramen (1) (1914-1920), dis Armèni (1915-1923) e di Grè pounti (1916-1923), perpetra pèr li Turc e qu’Ankara refuso toujour de recounèisse. Pensan à Cipre, territòri grè mounte li Turc an establi uno republico de marioto secessiounisto dins lou nord de l’isclo en 1983. Ié fau apoundre vuei l’ajudo pourgido pèr la Turquìo e la Russìo – autro poutènci emperialisto – is Azèri turcoufone dins sa segoundo guerro contro lis Armèni pèr lou countourrole de l’Aut-Karabagh vo Artsakh. Aquelo guerro s’es acabado emé la desfacho e lou retiramen, pèr lis Armèni, de territòri qu’èron armèni despièi 2000 an. Erdoğan pantaio de restaura l’Empèri óutouman e de veni lou grand menaire di musulman sounito dins lou mounde (2). Assajo vuei de recaliva lou conflit entre li Grè e li Turc à Cipre. Fai d’intrusioun en Libìo sènso parla de la Sirìo, de mounte vòu cassa vo elimina li Kurde, meme s’acò dèu favourisa lou retour de l’Estat islami. Emai li Kurde de Turquìo siegon óupremi, enebi de parla sa lengo e souvènt engabioula, represènton pamens 14 % de la poupulacioun d’aquéu païs e soun uno vertadiero espino dins lou pèd pèr Erdoğan.

Lou Partit de la Nacioun Óucitano denóuncio energicamen lis intrusioun d’Erdoğan dins l’Estat francés, qu’an pèr toco d’empacha li Turc de s’integra e de n’en faire d’islamisto de la costo pleno, valènt-à-dire d’atour de l’islamisacioun de la soucieta. Denóuncio tambèn la pusilanimeta de l’Unioun éuroupenco qu’auso pas entravessa li mirado emperialisto de la Turquìo, bord qu’Erdoğan menaço de descadena uno nouvello erso d’enmigracioun devers l’Éuropo.

Pèr lou Partit de la Nacioun Óucitano, l’autouritarisme tant coume tóuti lis emperialisme soun de denouncia. Proun vo tard, li pople, en Óucitanìo coume autro part, aussaran tournamai la tèsto e metran fin à l’emperialisme d’aquéli que li gouvèrnon ; ansin, realisaran lou vot de Francés Fountan d’un mounde fa de nacioun independènto e amigo.

Noto 1  Pèr n’en sabé mai, vèire en particulié <http://www.ben-vautier.com/ethnisme/analysourshes/ethnies/arameens.html>

2 Curiousamen, Erdoğan adóuto uno pousicioun ambiguïo envers lis Ouïgour, turcoufone e musulman, óupremi pèr uno autro poutènci emperialisto, la Republico poupulàri de Chino, en passant de sa denounciacioun d’un « genoucide » – fourmulado i’a uno deseno d’annado d’acò – à la recènto estradicioun, devers la Chino, d’Ouïgour refugia en Republico de Turquìo.

 

lo lugarn 136

lo lugarn 136

Tag(s) : #Lo Lugarn
Partager cet article
Repost0
Pour être informé des derniers articles, inscrivez vous :