Overblog
Editer l'article Suivre ce blog Administration + Créer mon blog

Aqueles vièlhs que vòlon pas daissar lo crostet

 

Lo poder es una dròga dura. Son addiccion pòt èsser mortala. Se parli d’acotumança letala es per çò qu’es arribat mai d’un còp, emai dins l’istòria recenta, qu’un cap d’Estat s’asseque sus son tròn. E aqueles gerontocratas èran pas totes reis. De remarcar a prepaus d’aquel bestial (comptètz pas sus ieu per me desencusar d’èsser republican), que d’unes an ça que la, agut la saviesa d’abdicar per prene un bocin de retirada. Prene un pauc de repaus abans d’anar trefolir al cèl e jogar los observators. Coma qué, cal pas jamai desesperar de degun… emai se quand o fan los reis onoraris an ja un pè dins la tomba.

Los annals, emai las colissas, dels poders son claufits d’exemples. Actualament un dels mai patetics concernís los Estats Units d’America. Donald Trump, setanta-quatre ans, qu’o vòlga o pas, va quitar l’Ostal Blanc. Lo quitarà en doçor per çò qu’urosament los politicians estasunians, que sián d’un bòrd o d’un autre, lo daissaràn pas a sa foliá se li veniá dins l’ase de lo voler pas quitar. Los quitis republicans l’an pro vist e se dison que n’an pro endurat atal. Emai dins lo cercle de sas relacions personalas, las gents començan -sens o dire publicament- de n’aver lor confle de sa megalomania. Lor triga de sarrar lors atraces e de quitar Washington.

Malurosament en tèrme de gerontocracia, los Estasunians van pèrdre al cambi. Fauta d’aver pas pogut far melhor en causa d’un sistèma politic que lor es pròpri, van pèrdre un President de setanta-quatre ans per ne recuperar un de setanta-uèit. Aquela corsa al poder per de vièlhs en cima de lor temps biologic es pas una pròva de bon foncionament democratic. E se me demandatz se seriá judiciós de decretar un edat maximal per se presentar a d’eleccions presidencialas (fa bon far se pausar las questions e i respondre), diriái de òc.

Las primàrias en çò dels Democratas amb Joe Biden e Bernie Sanders, totes dos de 78 ans, viravan qualques còps a un concors de retorica dins un ostal de retirada. Quina pietat de véser a la television la cara cavada (ai pas escrich cadaverica) de Joe Biden. Talament que d’unes se demandan se poirà téner quatre ans. Çò que d’un mal fariá un ben ! Aurián Na Kamala Harris coma primièra Presidenta dels Etats Units d’America. Atal van las causas de l’autra part de l’ocean Atlantic…

Alavetz, e de l’autra man de la Mar miègterrana ? Avèm ailà, dins la dictatura militara argeriana, un autre exemple de gerontocracia qu’es pas tanpauc en fusta de sapineta. De notar abans tota causa qu’en Argeria coma dins totes los paises a majoritat musulmana (i comprés Tunisia) i a pas ges d’alternativa : siá avèm una dictatura teocratica, siá una dictatura militara. La democracia e l’evolucion culturala son pas estadas previstas ni programadas per l’islam.

Aprèp las importantas manifèstacions popularas del « Hirac », « l’Argeria novèla » promesa pel president Tebbone virèt a la farcejada. De fach, es pas ni mai ni mens que l’esperlongament de la dictatura militara del Front de Liberacion Nacionala. Alavetz, l’Argeria gerontocratica de Boteflika perdura. Son totjorn los meteisses que trèvan los corredors del poder. D’alhors, los democratas argerians, arabis e berbèrs mesclats, se daissan pas enganar.

Lo president Tebbone, setanta cinc ans, al moment ont escrivi aquelas regas es, o seriá (que la tranparéncia es pas una vertut cardinala en dictatura) espitalizat en Alemanha amb una brava covid-19 sus l’esquina. Lo general Chengriha, cap d’estat-màger de setanta-sèt ans, seriá el tanben espitalizat en Soïssa. Per çò qu’es de Salah Gogil, lo president de la Cambra senatoriala, tengut d’assumir la relèva en cas que lo president desbrembrèsse de polsar, a uèitanta-nòu ans e, segon los que creson saber, es tras que malaut.

Autrament dich, los tres gerontocratas que bailejan actualament lo sistèma son secats fins a la codena. Lors relòtges biologics son completament abenats. De costuma, una dictatura militara a d’unas grandas capacitats de resiliéncia. Es sovent lo cas. A condicion, per çò que i a totjorn qualques condicions, qu’en aquesta fin de regne d’una generacion las que son a l’espèra s’entre-escotelèssen pas. Se jamai s’entretuavan seriá lo caós complet e los islamistas, totjorn a l’espèra de la mendre escasença, prendrián lo poder.

Una dictatura teocratica musulmana de mai sus la planeta seriá un malastre per l’umanitat. Entre doas calamitats cal saber causir la mendre. Es çò que fòrça maluroses Tunisians, Argerians, Egipcians e Sirians se pensan.

 Sèrgi Viaule

Aqueles vièlhs que vòlon pas daissar lo crostet
Tag(s) : #Sèrgi-Viaule, #Tot en Oc, #Tribune libre

Partager cet article

Repost0
Pour être informé des derniers articles, inscrivez vous :