Per qu’enfin l’obrador de l’autorota A 69 pòsca contunhar e s’acabar dins la patz civila

            Dins la nuèit del 22 al 23 d’agost d’ecolo-sacamands encagolats se son introdusits sus l’obrador de l’autorota A 69 (Tolosa-Castras) per botar lo fuòc a un pilar de pont en bastison. Non contents de l’acte de sabotatge, se’n son preses als pompièrs venguts per atudar l’incendi. Los soldats del fuòc son estat malament agressats fisicament per un calhaussatge en règla. Pièger encara ; los assalidors an getat suls pompièrs de coctèls molotov per los cremar. Segon los testimònis es un miracle que i aja pas agut de nafrats demest los salvaires. Calguèt que la gendarmariá intervenga per los desgatjar de la trapèla aprestada pels agressors. Finalament se’n tornèron sens poder arrestar l’incendi. La realitat es que los ecolo-sacamands se compòrtan al campèstre amb la meteissa violéncia e ferocitat qu’o fan los islamo-sacamands dins las banlègas. Es a esperar que las personas colpablas d’aqueles actes sián arrestadas e condreitament jutjadas per temptativa de murtre. Pr’aquò es plan d’aquò que se tracha. Tota impunitat seriá un còp mai un signe balhat als agressors de poder contunhar a semenar la terror en Sud-Albigés. Sèm a viure una presa d’ostatge de la populacion d’aquel parçan d’Occitània per un manat d’arlèris qu’es democraticament insuportabla. Remembrem un còp mai que la populacion locala, los elegits e lo teissut economic de Castras-Masamet e d’Albigés se son prononciats mai d’un còp en favor d’aquela infrastructura indispensabla al desvolopament de la region. Remembrem tanben que totes los recòrses judiciaris (nombroses) dels opausants son estat regetats.

Non assadolats de malafachas, lo dissabte 24 d’agost los ecologistas son anats incendiar lo prefabricat d’una entrepresa e panar de material e d’utisses. Lo dimenge 25 d’agost son tornamai sus l’obrador per agressar, amb un cable d’acièr, un agent de seguretat. L’an insolentat, li an tustat dessús e un dels bandits a ensajat de l'estrangolar amb una mena de cable d'acièr. La victima s'es aparada coma poguèt. Se’n tirèt urosament amb de marcas de d’esquinchament al còl. Un còp mai, de mercés lo professionalisme dels prepausats a l’òrdre public, i agèt pas de nafrats malament tocats. Foguèt pas lo cas anteriorament quand un obrièr de l’obrador, salvatjament agressat pels ecologistas, se retrobèt a l’espital de La Vaur (véser l’informacion del 23 d’abrial de 2024 sus aquel quiti sitenet del Lugarn). Aprèp aquela enauna agression fisica, segon la premsa « Lo ministèri public de Castras a fach obrir una enquista per violéncia agreujadas ». Notem que dins la meteissa jornada del 24 d’agost los ecologistas botèron lo fuòc a una veitura de polícia.

Tre lo 25 d’agost la gendarmariá arrestèt dins la ZAD de Saïx un particulièr sospechat d’aver agressat l’agent de securetat. Aqueste « desfavorablament conegut dels servicis de polícia ». Qual se’n estonarà ? Arrestat, mas per quant de temps e per quinas seguidas quand se sap que las agressions duran ara dempuèi mai d’un an ? Dins la ZAD las fòrças de manten de l’òrdre descobriguèron a sasiguèron ni mai ni mens que « de material destinat a fabricar d’armas », mas tanben fòrças causas panadas sus l’obrador de l’autorota.

Coma a Sivens fa dètz ans, los zadistas de Saïx fan regnar dempuèi de meses una atmosfèra insuportabla de guèrra civila. Foguèt la meteissa causa fa dètz ans quand destrusiguèron los centres vila d’Albi, Galhac e Tolosa (mobilièr public destrusit, veirinas de magasins brigalhadas, monuments als mòrts profanats, raubatòris, etc…). La populacion occitana qu’es dins son drech en demandant lo desenclavamentc del parçan, e que demanda pas que de viure en patz, n’a pro d’aquela violéncia dels ecologistas. Totes los zadistas sens excepcion son d’estrangièrs al parçan e de vilandreses que venon prene la populacion en ostatge. Venon exprimir e escampar lors fastasmas e lors paurs en çò nòstre. Son originaris de las vilas e an la pretencion inadmissibla de venir contèstar la volontat, mantunes còps exprimida, del pòble occitan. Se los ecologistas supòrtan pas las autorotas, pòdon totjorn anar crear de ZAD a París e demandar la renaturalizacion del periferic, infrastructura autrament polluissenta que non pas una pichona autorota entre Tolosa e Castras.

Aquela situacion de guèrra civila non pòt durar mai. Las gents demandan a las autoritats competentas d’arrestar e condemnar tota persona que se serà renduda colpabla d’actes reprensibles per qu’enfin l’obrador de l’autorota A 69 pòsca contunhar e s’acabar dins la patz civila. Demandan atanben, e entre maitas causas, que la seguretat dels obrièrs siá assegurada sus l’obrador. Vòlon viure e trabalhar al país dins la serenitat.

      Sèrgi Viaule