Overblog
Editer l'article Suivre ce blog Administration + Créer mon blog

L’Europèa en deficit de democracia

            En Euròpa cal destriar doas institucions politicas màger : l’Union Europèa e lo Conselh d’Euròpa. Mèfi ! aquel Conselh d’Euròpa, lo cal pas confondre amb lo Conselh Europèu que recampa regularament los caps d’Estat e de govèrn de l’Union Europèa, nimai amb lo Conselh de l’Union Europèa (tanben apelat Conselh dels ministres de l’Union Europèa) qu’el recampa los ministres dels Estats membre per domèni de competéncia. La proximitat de las tres denominacions a l’entorn dels vocables « Conselh » e « Euròpa » prèstan bravament a confusion.

Mas, s’o volètz plan, tornem-ne a Conselh d’Euròpa. Aqueste, creat lo 5 de mai de 1949, recampa d’uèi 47 paises que geograficament van d’Islàndia fins a Azerbaitjan. Segon sos estatuts, sa tòca es de favorizar la democracia e lo respècte dels dreches fondamentals, civils e politics de sos 833 milions d’estatjants. Tot aquò poiriá èsser cocanha, mas deploram de constatar que los dreches politics de sos estatjants membres de nacions sens Estat (Occitans, Catalans, Basques, Còrses, Galleses, Escoceses, Sardes, etc…) son totjorn pas respectats, nimai aprèp 71 ans d’existéncia de l’institucion.

Çò interessant de notar, pasmens, es que cada ciutadan d’aquel grand recampament d’Estats es, sensat, autorizat a pensar que sos dreches fondamentals e notadament sos dreches politics devon èsser respectats. Per aquò far, a la possibilitat de sasir, quora que siá, la Cort Europèa dels Dreches Umans qu’es l’aplech juridic del Conselh d’Euròpa (e non pas de l’Union Europèa coma se poiriá pensar). Emai s’es pas aisit de sasir aquela Cort, deuriam, nosaus Occitans, engatjar un fum de proceduras per far respectar nòstres dreches. Estrategicament deuriam menar una guerrilla judiciàra contra l’Estat francés opressor. Que las proceduras capiten o pas, amodariá almens una pression permanenta suls politicians europèus.

De notar tornamai que lo Conselh d’Euròpa entreten pas de ligam dirècte amb l’Union Europèa, emai se per aderir a l’Union Europèa los postulants devon prealablament aderir al Conselh d’Euròpa coma gatge e assegurança de lor foncionament democratic. Per exemple, paradoxalament França poiriá pas d’uèi aderir a l’Union Euròpa sens aver prealablament ratificat la Carta europèa de las lengas regionalas o minorizadas. Cossí se pòt far qu’aquela exigéncia siá pas retroactiva ? Aquò questiona la credibilitat de l’Union.

Los estatuts del Conselh d’Euròpa estipulant que l’institucion “a per objectiu de favorizar l’espelida d’un espaci democratic e juridic comun en Euròpa, notadament garantit per la Convencion europèa dels dreches umans e autres tèxtes de referéncia tocant a la proteccion de l’individú », aquò deuriá regaudir los Occitans que sèm e tanben los Catalans dins lor combat democratic per la recuperacion de lors dreches nacionals. D’ont mai que los tèxtes fondators del Conselh d’Euròpa precisan tanben qu’a per tòca « la mesa en valor de l’identitat culturala d’Euròpa e la seu diversitat ». Melhor qu’aquò ! : « Lo Conselh d’Euròpa s’es fixat per tòca de desvolopar l’estabilitat democratica en Euròpa en sostenent las reformas politicas, legislativas e constitucionalas anant dins aquela direccion ». A tè ! Lo Conselh d’Euròpa seriá aquí per sosténer las reformas constitucionalas qu’anirián cap a mai de democratizacion en Euròpa ? E cossí obligar pas, a pena d’exclusion, sa compausanta espanhòla de modificar sa Constitucion per alargar la democracia en Catalonha, en Espanha e del còp en Euròpa tota ? Cossí obligar pas, a pena d’exclusion, son membre francés de modificar sa Constitucion per li permetre de poder, entre maitas causas e al minimum, ratificar la Carta europèa de las lengas regionalas o minoritàrias ?

Se vertadièrament lo Conselh d’Euròpa se balhava per mission imperativa de « cercar de solucions comunas als problèmas de societat, coma la discriminacion envèrs las minoritats », alavetz, dins una volontat de justícia e de democracia acceptariá la creacion d’Estats novèls per liberar las nacions encara somesas al colonialisme dins son airal de competéncia. Aquò s’apèla l’alargament intèrne.

Cossí aquela institucion politica qu’afortís sens parpelejar que « La Convencion europèa dels dreches umans e la Carta europèa de las lengas regionalas o minoritàrias fan partida dels tèxtes de referéncia eissuts de sas activitats », pòt daissar encara d’uèi de nacions dins la dependéncia ? E cossí ? E cossí ?..

Tot simplament per çò que « Las Convencions adoptadas per l’Amassada parlamentària del Conselh d’Euròpa an pas de caractèr obligatòri e lor ratificacion pels païses sòcis se fa sus una basa volontària ». Ite missa est…

Mas alara a de qué servisson los 648 membres de l’Assemblada parlamentària del Conselh d’Euròpa, mai sos 60 observators o « associats per la democracia » (parli pas aquí del nombre dels foncionaris que fan virar aquela Assemblada) ? A de qué servisson los 648 representants del Congrés del Conselh d’Euròpa compausat de la Cambra dels poders locals e de la Cambra de las Regions (parli pas aquí del nombre dels foncionaris que fan virar aquel Congrés) ? Se coneissèm pas lo nombre dels foncionaris al servici de l’Assemblada parlamentària e del Congrés, coneissèm per contra lo nombre dels foncionaris que se trachan sonque del Secretariat general de l’institucion : « Lo Secretariat general compta environ 1 800 foncionaris eissits dels paises sòcis ». Fai tirar Marius e sortís lo pòrtamoneda ! Quina burocracia ! Quina usina de gas, non pas per produsir de gas, mas de vent !

Per çò qu’es de l’utilitat del Conselh d’Euròpa, reputat promòure la democracia e la patz, parlem-ne. Alara qu’Armenia e Azerbaitjan son totes dos sòcis de l’institucion, aquesta es estada incapabla de reglar lo conflicte entre las doas nacions. Pr’aquò, compte tengut de las chifras que veni de balhar son pas las gents que mancan per se metre a l’entorn d’una taula e, segon de critèris coma l’istòria e la lenga, seriá estat aisit d’arrestar los contorns geografics de las doas nacions. Lo Conselh d’Euròpa es pas estat capable de far tèrç dins aquel conflicte e, se me referissi a l’istòria e a la realitat de las causas, es pas jamai estat capable de res en defòra de, de quand en quand, mandar d’observators per d’eleccions. Del fach qu’es pas que consultatiu e qu’emet pas que de vejaires sens cap de poder de los far aplicar, cossí poiriá far respectar sas decisions ? Mas alara la question de sa quita existéncia se pausa. Coma se pausa la question de l’existéncia de totas las organizacions politicas internacionalas que prenon de decisions politicas de justícia e d’equitat sens las poder far respectar.

Malgrat lo nombre de sas institucions, de sos parlaments e de sos Conselhs (Union Europèa e Conselh d’Euròpa acampats), es a desesperar de la volontat per Euròpa d’amodar una vertadièra etica democratica : empachèt pas l’agression de Turquia contra Cipra, d’Azerbaitjan contra Armenia nimai l’empresonament per Espanha d’elegits catalans dins l’exercici de lor mandat. Paura Euròpa, paura umanitat !

Sèrgi Viaule

Union Europèa e lo Conselh d’Euròpa

Union Europèa e lo Conselh d’Euròpa

Tag(s) : #Sèrgi-Viaule, #Tot en Oc, #Tribune libre
Partager cet article
Repost0
Pour être informé des derniers articles, inscrivez vous :