Joan-Claudi Chabrotin a passat lo darrièr ga

    Lo dijòus 25 de julhet de 2019 desfuntèt a Pradèla, en país d’Olmes, Joan-Claudi Chabrotin (Chabrouty per l’administracion coloniala). Es totjorn estat un militant afogat de la causa occitana. D’ora, Joan-Claudi aceptèt pas la situacion de negacion politica que ne patís Occitània. Sa consciéncia nacionala remontava de las annadas seissanta. Un pauc pus tard, dins las annadas setanta, es estat un dels primièrs a s’engatjar dins lo sol combat que valga per liberar un país, valent a dire lo combat politic. Es estat un dels rares a dintrar en occitanisme en aguent consciéncia de la primautat del combat politic sul l’accion culturala. Dialoguèt amb mai d’unas organizacions politicas mas malurosament foguèt pas pro escotat. Lo siaguèsse estat que la situacion politica del país seriá probablament pas la que coneissèm. Demorèt totjorn simpatisant del Partit de la Nacion Occitana e son abonament al Lugarn corrís encara fins a la fin de l’an.

    Joan-Claudi Chabrotin consacrèt plan d’energia a la defensa de l’identitat occitana. Foguèt un pragmatic. Puslèu que de longa far de castèls dins la luna, sabiá que lo combat comença davant sa pòrta. Sabiá que nòstres compatriòtas son de convencer ostal per ostal, carrièra per carrièra. Es la rason per la quala foguèt conse de Pradetas, un vilatjòt del País d’Olmes.

    Pendent de decennias foguèt de totas las batèstas. Esparnhèt pas ni son temps ni son vam per far avançar lo drech a l’autodeterminacion per Occitània. Joan-Claudi foguèt un militant complit. Aviá una analisi aguda de la situacion dels rapòrts de fòrça e èra d’una grand lucididat per çò qu’es de la realitat dels afars publics. Puslèu que de s’embarrar dins de sòmis destimborlats, sabiá que tota òbra deu èsser entamenada per la debuta. Domatge que siá pas estat mai seguit dins son exemple. Mentre qu’el mostrava lo camin, d’autres vesián pas que son det. D’aquò Joan-Claudi Chabrotin n’èra malcorat. Mas aquò l’empachèt pas de luchar sens relambi qu’èra un òme de fe. Aviá una fe imbrandabla dins son pòble. Malgrat la carga de las annadas, coma cada an, venguèt encara l’an passat a la ceremonia comemorativa de Montsegur organizada per Occitània e Libertat.

    Al delà del militant, Joan-Claudi Chabrotin es estat un occitan d’èime, amb totas las qualitats d’amistat, de solidaritat, d’umanisme e de fraternitat qu’aquò supausa. Foguèt un exemple per mantunas generacions d’occitanistas.

    Sas obsèquias se debanaràn dimars 30 de julhet de 2019 a la glèisa de Pradetas a doas oras e mièja del vèspre. La messa serà dicha en lenga nòstra per un autre valent de la nacion occitana, l’abat Jòrdi Passerat.

    Lo Partit de la Nacion Occitana presenta sas condolenças atristesidas a sa veusa, sos enfants, felens e tota la seu familha.

Adieu Joan-Claudi, adieu l’amic.