Overblog
Editer l'article Suivre ce blog Administration + Créer mon blog

Landiridi, un grop musical que s’amerita d’èsser mai conegut

 

   Lo grop musical Landiridi es un duo compausat de la cantaira Francesa de Fanti e del musician Bernat Felip. Tant val dire que lo grop es minimalista al nivèl de l’orquestracion : una cantaira e un guitarrista. Fòra lo cant a capela, se pòt pas far mai despolhat. Mas quina complicitat entre los dos protagonistas !

   Aqueste disc es la soma de setze tròces tradicionals. Tre que se parla de cançons tradicionalas, sovent òm imagina una orquestracion elaborada a basa d’instruments tradicionals. La granda suspresa amb « La lutz del jorn » es qu’aquestas cançons son sonque acompanhadas d’una guitarra acostica, « una guitarra seca » coma disián fa qualques decennias. Avèm aquí quicòm de plan singular dins lo mitan de la musica occitana. Soi espantat de constatar un còp de mai qu’aquel disc siá paregut dins lo quasi anonimat. A ma coneisséncia cap de revista n’a pas jamai parlat. Pr’aquò se tracha d’una òbra tras qu’originala e meravilhosament capitada. A créire qu’en Occitània degun escota e legís pas jamai res. Dins aquelas condicions cossí nòstra cultura, ja enebida de mèdia e doncas de difusion, poiriá se desvolopar ? Un còp mai, una brava capelada a totes los artistas que causisson la lenga nòstra per s’exprimir. A n’aquò se mesura lor sensibilitat e lor generositat.

   Mas tornem-ne al disc de Landiridi. E d’en d’abòrd per notar la votz pregonda, clara e mestrejada de Francesa de Fanti. Aquela artista (qu’es tanben una famosa dançaira classica) es dotada d’una votz rica que sap utilisar amb un registre ample de modulacions, çò que li permet d’interpretar tota la gama dels cants tradicionals. Aquò pòt anar de Los tres fraires fins a La nòvia en passant per Para lo lop. D’unas de las cançons enregistradas sus aquel disc son a dançar mentre que d’autras son de cants de trabalh, o de melodias doças. Un escapolon bèl del cant tradicional se tròba dins aquel enregistrament. A notar a n’aquel prepaus la capitada de la causida. Èra pas evident de reténer pas que setze titols dins la massa del patrimòni tradicional occitan.

   Cantar sonque acompanhada d’una guitarra es una escomesa que sola podiá relevar una cantaira amb una tessitura vocala espandida. Francesa de Fanti sabiá qu’èra un prètfach dins sas còrdas. O sabiá per o aver mesurat mai d’un còp sus scèna. Per çò qu’aquò se sap pas pro, mas lo grop Landiridi se produsís cada còp que possible.

   Es un plaser d’ausir aquela votz tindarèla e modulada. D’ont mai que Francesa de Fanti a una diccion excepcionala. Es una cantaira que respecta la lenga. Jòga a l’encòp de sa votz e de sa lenga, aquí son sos instruments. Es una virtuòsa dels dos. Entre maites tròces, vos recomandi « L’autre jorn me maridèri ». Dins aquela cançon, Francesa de Fanti daissa s’exprimir la prigondor de sa personalitat. Sap tirar tota la musicalitat, la riquesa melodica de cada pèça tradicionala. A ausir lo disc se compren que darrèr aquel enregistrament i a un trabalh de longa data. I a mai que mai una grand passion per la cançon populara occitana.

   Aquela votz remarcabla es acompanhada per l’engèni musical de Bernat Felip. L’armonizacion entre votz e còrdas es embelinaira. Mai qu’un acompanhament se tracha aquí d’un entrevescament de sonoritats que lo duò Landiridi nos propausa. La mestresa musicala de Bernat Felip permet una fusion justa entre las proposicions dels dos artistas. Per cada cançon, lo musician imagina una composicion origina e singulara. Una composicion que se marida e dança amb la votz de la cantaira. Nais d’aquela fusion una sublimissima poesia.

   Lor musica carreja una leugièretat d’anma qu’encanta e emmasca l’auditor. Bernat Felip tira de sonoritats multiplas e mirgalhadas del seu instrument. Sap far cantar sa guitarra. Ne tira de variacions enfachinantas. Lo rescontre dels dos musicians balha una produccion plena de generositat e de gaug. An agut l’èime de tornar visitar lo genre tradicional d’un biais fins alara jamai explorat. Benlèu que los afogats de musica tradicionala s’i retrobarán pas d’efièit, mas a ieu m’agrada quel biais despolhat d’interpretar lo cant tradicional. Gausi quitament escriure qu’es un biais modèrne e desposcat d’enfaciar lo patrimòni musical nòstre. Aquò enlèva pas res a totas las autras interpretacions possiblas e imaginablas, mas aquel viatge al país de Landiridi m’a esmòugut e estrambordat. Vos convidi de ne far l’experiéncia, serètz pas decebuts.

   Francesa de Fanti e Bernat Felip an sabut crear un univèrs musical feutrat e intimista que dobrís sus un monde armoniós a plaser. Totòm ganharà a lo descobrir.

 

Pèire Rabasse

 

« La lutz del jorn », disc de setze titols del grop Landiridi.

Per lo comandar : landiridi@yahoo.fr o tel : 05 63 74 57 71

 

 

 Francesa de Fanti e Bernat Felip, lo grop Landiridi

Francesa de Fanti e Bernat Felip, lo grop Landiridi

Tag(s) : #Tot en Oc, #culture, #Pèire Rabasse
Partager cet article
Repost0
Pour être informé des derniers articles, inscrivez vous :