Overblog
Editer l'article Suivre ce blog Administration + Créer mon blog

Malgrat las dificultats, la creacion artistica occitana
demòra dinamica

 

            Soi totjorn estat, e demòri meravilhat cada còp que descobrissi de joièls culturals occitans novèls. Contrariament a çò que se poiriá pensar dins d’unes moments de descoratjament, d’aquestes joièls se n’escrincèla cada jorn als quatre caires d’Occitània. Malurosament, tròp sovent, demòran confidencials. Sovent lor difusion traspassa pas lo terrador quand, per exagerar pas qu’un pauc, demòra pas circonscriches que dins lo cercle familial dels creators.

            Pel Nadal passat, anguèri escotar de nadalets. Cantava lo triò Nòu sòrres. Un grop vocal encara tròp pauc conegut compausat de tres femnas : Genevieva Sandral-Masenc, Maria Vernhièras e Murièl Vernièras. Aquela còla albigesa de cantairas la coneissiái ja per l’aver ausida, qualquas annadas enlà, alara que balhava un de sos concerts de cançons tradicionalas. A cada còp que las tòrni escotar, es un encantament renovelat. Regreti que lo grop virèsse pas pro dins Occitània tota, poiriá far aprofiechar de son engenh lo mai de monde possible. Planharai pas jamai pro cossí de causas tan meravilhosas demòran dins una mièja clandestinitat. Es un pecat de constatar que los artistas occitans arriban pas a rescontrar lor public. Es a nosaus totes de trabalhar per provocar lo rescontre.

            Lo triò Nòu sòrres canta a capella e, quand ne vira, d’un biais polifonic. Las voses de las tres cantairas son tindairas a plaser. Se prèstan remirablament a l’interpretacion dels nadalets. Me fan pensar a un trinhon. Las sonoritats de lors cants esclairan las nuèits frejas de decembre. Pivelan l’auditòri talament venon del fons del còr. Cap a d’espacis d’apesantor, lors modulacions empòrtan sus lors alas l’èime de cadun. D’ont mai quand s’enairan dins la nauta nau d’una glèisa. Alavetz, aquí l’emmascament ven complet.

            Genevieva Sandral-Masenc, Maria Vernhièras e Murièl Vernièras trabalhan lo cant desempuèi plan temps. Lo gròp es format desempuèi bèl briu. A las ausir cantar, e benlèu encara mai a las véser en concèrt, se sentís una complitat artistica despartida. Aquò’s aquò una de las fòrças de Nòu Sòrres e probablament la rason de lor capitada. An pas a trastejar per s’acordar. Entr’elas son de longa sus la meteissa nòta per segurament banhar dins la meteissa sensibilitat. Aquò fa la fluiditat de lor cant.

            Dison aimar far cantar la lenga. Los nadalets que prepausan dins lors concèrts son mai que mai estat collectats en Albigés, Roèrgue e Carcin. Mas cantan tanben de nadalets del provençal Nicolau Sabolin e d’autres compositors occitans d’epòcas diferentas. Lor repertòri es vast. S’acontentan pas de la tradicion populara, emai se, solide, i posan a bèl èime, talament nòstra cultura es rica de cançons de Nadal. Es pas un mite, nimai un fantasma de pensar que d’unas d’aquestas pèças son estadas compausadas per de pastres o de mestierals. Lo fach que nombroses son los nadalets anonims, o daissa supausar.

            La factura del nadalet es una causa, son interpretacion n’es una autra. Los adobaments del grop Nòu Sòrres son estat alestits de tal biais que l’auditòri se daissa, pauc a cha pauc, emportar pel fachin del cant. D’ont mai que l’estrambòrd de las cantairas es aquí per butar mai a la ròda dels mistèris vocals. Lo grop, de mercés a la personalitat de caduna de sas voses, a saput demorar dins la tradicion. Es aquela mestresa de la coneissença de las òbras que fa lo fachin d’aquelas interpretacions.

            Se totòm pòt pas assistir als concèrts de Nòu Sòrres, almens cadun pòt crompar lo disc de nadalets que lo grop ven d’enregistrar. Un disc realizat per Bernat Bouvier que compren pas mens de dètz-e-sèt tròces. D’unes d’aquestes nadalets, coma « Enfants revelhatz-vos » o « Lèva-te viste Bertomieu » son, se pòt dire, coneguts dins Occitània tota. D’autres son plan mai locals coma « Nadal del Sidòbre » o « Enfants de Pradials ». Mas totes son d’una ingenuïtat encantadora. Fan partida d’una tradicion d’abans la tradicion del Paire-Nadal. Mas se la societat occitana urosament evoluís, una tradicion non sauriá ne caçar una autra. Nòstra cultura es pro viva per poder digerir d’apòrts successius.

            Mas aquò sera possible sonca se sèm capables de prene en carga la difusion de la creacion artistica occitana. Nimai per èsser condemnats, ara per ara, de passar per de canals sosterranhs e artesanals d’espandiment, aquò’s una rason de mai per los utilizar e los renfortir. De notar que sul lo siti Net de presentacion del triò trobarètz qualques tròces per escotar. S’aqueste grop vocal nos agrada, se coma ieu pensatz que contribuís bravament a l’illustracion de la cultura occitana, alavetz, al vòstre torn de lo far coneisser.

 

Sèrgi Viaule

 

Per far virar lo grope o crompar son disc, aquí avètz sas coordenadas :

 

Associacion Nòu Sòrres

 

http://nousorres.free.fr

 

La Crosilha

81170 Livèrs e Casèlas

Telefòn : 05 63 55 77 19

Telefonet : 06 79 88 69 57

Corric : nousorres@orange.fr  

 

Lo triò Nòu sòrres canta a capella

Lo triò Nòu sòrres canta a capella

Tag(s) : #Sèrgi-Viaule, #Tot en Oc, #culture
Partager cet article
Repost0
Pour être informé des derniers articles, inscrivez vous :