/image%2F0568858%2F20140111%2Fob_0348f4_logo-pno-jpg){kind=logo}
Lo Partit de la Nacion Occitana reagís a la conferéncia de prensa de François Hollande
Lo Partit de la Nacion Occitana (PNO) prenguèt coneissènça amb interés de çò que diguèt François Hollande del temps de la sia conferéncia de prensa del 14 de genièr de 2014.
Aquel d’aqui s’es clarament prononciat per la redusida del nombre de las regions que constituisson lo malhatge administratiu del territòri de la Republica Francesa, per tal de mestrejar la despensa publica.
Lo PNO : saluda aquesta presa de consciéncia del personatge mai naut de l’Estat Francés. Aquesta redusida del nombre de las regions implicarà de fusions e de restructuracions, que son pas estadas encara detalhadas.
Lo PNO es cap e tot a favor del regropament de las regions administrativas occitanas de l’ora d’ara, sens fòrabandir de retalhadas de lors confinhs. Lo PNO combatrà e farà conèisser la sia opausicion ferma e determinada cap a una fusion d’una region occitana amb una region que o es pas.
Lo PNO ramenta que s’es tostemps prononciat per suprimir los departaments que lor avenidor es pas estat evocat lo 14 de genier de 2014.
Uèi las missions administrativas fisadas als departaments e a las regions son pas de la medisha natura. Se lo Departament dispareis i aurà una represa obligatòria de las ancianas competéncias departamentalas per las regions e los personals administratius departamentals estacats a-n-aquestas missions contunharàn lo lor trabalh jos l’egidi de la Region.
Lo PNO desira que l’Estat Francés s’engatge fin finala dins una vertadièra decentralizacion. Volèm que l’Estat balhe de novèlas competéncias legislativas e fiscalas per las regions e que lo financiament del budget de las regions siaga assegurat per la talha collectada sus plaça, e una partida negociada sería reversada al poder central a Paris.
Partit de la Nacion Occitana
15 de genièr de 2014
Lo Partit de la Nacion Occitana reagís a la conferéncia de prensa de François Hollande