Lo Lugarn n°108 : Pèr l’emancipacioun naciounalo de l’Óucitanìo

Pèr l’emancipacioun naciounalo de l’Óucitanìo,utilisen li metodo dóu siècle 21en
per Jan Peire Alari
Après agué crea lou Partit Naciounalisto Óucitan à Nissa en 1959, Francés Fontan aguè d’embroui emé la justiço franceso. Persegui pèr ajudo à la desercioun e à l’insoumessioun, mai peréu en resoun de soun oumousseissualita, chausiguè de s’eisila dins uno di valado óucitano d’Itàli, à Fraisso dins la Vau Varacha. Doumaci un obro achinissènto de terren, faguè prene counsciènci de soun óucitanita au mounde di valado, que l’ignouravon. Creè lou Movimento Autonomista Occitano que couneiguè dins soun tèms quàuqui sucès eleitourau.
Vuei, un mié-siècle pus tard, lou MAO eisisto pas pus e li garrouio interno empachon pèr aro la creacioun d’un nouvèu mouvamen pouliti óucitan dins li valado. Dins l’Óucitanìo de l’Estat francés, lou mouvamen pouliti óucitan es divisa emé lou Partit Óucitan, autounoumisto d’esquerro, alia d’EELV, ço que i’a permes d’agué 5 counseié regiounau, Libertat independentisto se vouguènt de la « esquerro revouluciounàri », Iniciativa pèr Occitània que se definis coume labouratòri pouliti, culturau e souciau e se dis pèr l’emancipacioun naciounalo de l’Óucitanìo, lou Partit de la Nacioun Óucitano, independentisto óucitan e etnisto e enfin lou Gouvèr Prouvisòri Óucitan que se vòu en dessus di partit. Tóuti aquésti partit e mouvamen representon bèn gaire de militant pèr uno poupulacioun estimado à 15 milioun en Óucitanìo qu’uno bello part es pas óucitano d’ourigino. Partènt d’aqui, Dàvi Grosclaude aguè dins l’idèio de traire lou Manifeste óucitan qu’a deja reculi quicon coume 700 signaduro e que se definis coume un tras-partit. Se pòu espera qu’uno bono part dis elegit óucitanisto presenta souto uno plato-formo coumuno permetra de crea un maiun e un group d’enfluènci (lobby) que poudrié pesa sus li decidèire. Se pòu vèire peréu coume uno estapo devers la counquisto dóu poudé pèr lis óucitanisto en Óucitanìo. Veiren i resulto dis eleicioun municipalo de l’an que vèn se l’assai dóu Manifèste es trasfourma. La partido seguènto risco d’èstre bèu cop mai dificilo de jouga. Pèr crea uno forço poulitico óucitano cresiblo qu’ispire lou respèt i partit pouliti tradiciounau enrasiga au nostre, faudra mai que quàuqui counseié municipau óucitanisto, valènt à dire de conse, de counseié despartamentau, de counseié regiounau, de deputa, de senatour. Amiro impoussiblo sènso alianço emé de forço poulitico tradiciounalo franceso e pas soucamen EELV. Sian pas proun fort pèr nous passa d’alianço e lou devendren pas entre 2014 e 2017. D’un autre las, en nous engajant dins la draio dóu Manifèste óucitanisto se sian pas figura que li partit pouliti francés en generau e óucitan en particulié sarien despassa. Avèn pas renouncia à la renouvacioun dóu Partit de la Nacioun Óucitano. Aquesto renouvacioun es luen d’èstre eisado dins un partit que si cadre vieiisson. D’ùni demié éli se penson que soun li pus bèu e li meiour, qu’avèn rèn de cambia e que lis autre an que de veni vers nautre. Aqueste biais, tant ancian coume lou PNO, s’es trouba de frucho sènso despièi de tèms. Partejan pas ‘quéu poun de visto. Avèn besoun d’urgènci de generacioun mai jouino d’ome e de femo subretout e de sourti d’aquesto renoumado d’elitisme. Devèn de mai faire lou contre i caricaturo de nòsti pousicioun : sian pas un partit fascisto e racisto de drecho estrèmo. Ansin, nosto pousicioun sus Israël en tant qu’etnisto es mai nuançado que lou pretèndon aquéli que soun voulountarimen de marrido fe. Nosto revisto Lo Lugarn es d’uno bono tengudo inteleitualo e es pas necite d’èstre universitàri pèr i’escriéure. Utilisan lis óutis dóu siècle 21en e entre autre li maiun soucian. Avèn un blog. L’acuei qu’es fach à nòsti publicacioun mostro à bèus iue vesènt qu’avèn un poutenciau d’aderènt de 200 persouno qu’avèn pas reüssi d’ajougne.
Tant se pòu que lou militantisme tradiciounau dins un Partit pouliti tradiciounau siegue devengu mens atrivènt. Quan arribaren-ti enfin de mounta de visio-counferènci pèr evita au mounde de se desplaça d’un bout l’autre de la vasto Óucitanìo ? Qùntis acioun councreto pèr l’emancipacioun de nosto nacioun e lou meiouramen de la vido vidanto poudèn-ti prepusa à nòsti coumpatrioto ? Qùntis avantage troubarien lis inmigra de touto meno (coumprés aquéli dóu nord de la Lèiro) à s’integra à la culturo óucitano ? Coume l’autounoumìo e lou federalisme, liogo de l’iper-centralisme atuau, permetrien de miés adouba li proublèmo ecounoumi de l’Óucitanìo emai siguessian en tèms de criso ?
Adurre de responso à-n-aquéli questioun moustrarié i gènt qu’avèn li pèd sus terro e que s’interessan pas soucamen à la lengo e la culturo d’O. Acò vai soulet, un partit independentisto óucitan (avèn pas d’escoundre aquel óujeitiéu d’independènci à long terme) pòu pas èstre à l’ouro d’aro un partit de masso. Vaqui coume vai que, sènso renouncia d’èstre ço que sian e à nous desvouloupa, nosto presso de part dins lou proujèt dóu Manifèste óucitanisto es lougi.
Ço qu’un ome soulet, Francés Fontan, a reüssi dins soun tèms à crea à la mesuro di valado óucitano d’Itàli noun pòu èstre envisaja à la mesuro de l’Óucitanìo de vuei dins soun ensèn. Lou biais de faire d’un Jan Lasalle, deputa óucitan de Biarn, que vai au rescontre di « francés » pèr escouta ço qu’an de dire e qu’entèndon pas à Paris, es simpati, tant coume l’ome l’es tambèn. Mai es-ti bèn utile ? Li soulucioun di proublèmo de la Franço, e dóu meme cop de l’Óucitanìo amenistrado pèr elo, podon ti sourti de la Vox populi ? D’aiours li soulucioun bono pèr la Franço soun-ti bono pèr l’Óucitanìo ? Tant se pòu que noun. De tout biais, se podon rescountra lis óucitan autramen qu’en fasènt de porto à porto encaro que i’aguèsse proun de militant pèr acò faire. Que nous agrade o noun, aquéu siècle e aquéu mounde soun li nostre. Utilisen n’en si metodo e pas aquéli dóu siècle passa.