Partit de la Nacion Occitana - Eleccions cantonalas del 20 de mars de 2011

Comunicat
Eleccions cantonalas  del 20  de mars de 2011

 Lo movement politic occitan que ja dispausa de 5 conselhièrs regionals dempuèi mars de 2010, un en Aquitània, un en Auvernha, un en Miègjorn-Pirenèus e dos en Provença, presenta 20 candidats sus 600 sètis renovelables a las eleccions cantonalas (un candidat per lo Partit de la Nacion Occitana, 18 per lo Partit Occitan e un per Libertat).

Es encara tròp pauc mas es una estrategia deliberada que cerca a forçar las autras fòrças politicas a se posicionar rapòrt a la reivindicacion occitana e a contunhar lo lent procèssus de conquista del poder politic dins las regions occitanas.

Çò que recampa totes aqueles candidats es mai fòrt que çò que los dessepara : la volontat de conquistar l’autonomia per aquelas regions.

Fa que lo Partit de la Nacion Occitana apèla las electrices e los electors a votar per eles se son presents dins lor canton o, a fauta, pels candidats, quina que siá lor color politica, que prenon en compte dins lor profession de fe la promocion de la lenga e de la cultura occitana per de mejans concrets e la reinvindicacion d’una vertadièra reforma de las collectivitats territorialas ont las competéncias delegadas per l’Estat serián complètament compensadas financièrament.

Lo melhor mejan d’assegurar aquel finançament seriá l’autonomia fiscala, l’impòst levat a pòst demorant per la màger part a la disposicion de las collectivitats territorialas e una partida sonque estant reversada a l’Estat.
      10 de mars de 2011

Partit de la Nacion Occitana
Joan-Pèire Alari
Capiscòl per interim
10 carrièra de Romàs
47000 Agen(Occitània)
      +33 6 76 47 32 12

joan.peire.alari@gmail.com
http://www.p-n-o.org