Occitània-Lo Partit de la Nacion Occitana en Avinhon

Comunicat

Lo Partit de la Nacion Occitana, que festejèt l’an passat lo 50en aniversari de sa creacion per Francés Fontan, acampèt son Conselh Nacional aquesta dimenjada de Pascas en Avinhon.

La causida del lòc respond a la preocupacion de marcar l’occitanitat de Provença, mai que mai del Comtat Venaicin e de rendre omenatge a Frederic Mistral, que trabalhèt a la renaissença de la Nacion d’Oc.

Aquel conselh èra lo de la renovacion engimbrada pel president novèl del partit, Felip Bonnet.

L’ambicion del Partit de la Nacion Occitana es de construire una Occitània autonòma coma etapa cap a una liberacion totala de la nacion occitana de la tutèla dels estats francés, espanhòl (Val d’Aran) e italian (valadas occitanas del Piemont italian) sul plan politic, economic e social.

Aquela liberacion menarà a la creacion d’una Republica federala occitana, largament descentralizada, membre de l’Union europèa e de l’ONU.

Le Partit de la Nacion Occitana prepausa d’i arribar per de mejans exclusivament democratics e pacifics, es a dire en conquistar pauc a cha pauc, per la participacion a las eleccions, lo poder dins las regions occitanas sul modèl del govèrn autonòm del Val d’Aran balhat per la Generalitat de Catalonha de l’estat espanhòl.

Aquela tòca s’inscriu dins lo corrent de renaissença de las nacions sens estat en Euròpa, mai que mai, Catalonha, lo País Basc, Còrsega, lo País de Gallas e Escòcia.

Lo Partit de la Nacion Occitana se felicita donc de las voses obtengudas pels autonomistas e independentistas còrses a las eleccions regionalas de mars de 2010. Saluda tanben l’eleccion de cinc conselhièrs regionals occitanistas que poiràn obrar utilament per la cultura occitana mas pensa pas que lor aliança amb Euròpa Ecologia lor permètra d’avançar sul camin de l’autonomia.

L’avenir es dins una aliança de totas las fòrças politicas occitanas dins l’independéncia rapòrt als partits franceses.

Partit de la Nacion Occitana  Lo 5 d’abrial de 2010

B.P 44 F - 30201 Banhòus de Cèsa

Felip Bonnet, capiscòl

F - 31440 Marinhac- (Occitània) +33 6 81 37 81 14*