Catalonha / serem a Barcelona lo 11 de setembre de 2012

Anem Òc per l’independéncia de Catalonha e d’Occitània !

De Bordèu a Niça, de Vièlha a Finestrella, de Montluçon a Carcassona, sèm occitans, sèm pas franceses.

Avèm nòstra lenga pròpria coma los catalans. Donc sèm una nacion coma Catalonha, nòstra nacion bessona, ambe laquala avèm una istòria comuna.

La Republica francesa, siá disent una e indivisibla, refusa de reconeisser las nacions que la compausan mas que començan de se desrevelhar e viran lor agach de cap a Barcelona.

Lo Partit de la Nacion Occitana, fondat per Francés Fontan a Niça en 1959, es favorable a l’independéncia de totas las nacions sens estat del monde e donc a l’independéncia dels païses catalans reunificats, de Perpinhan a Alacant.

Lo Partit de la Nacion Occitana participèt a la manifestacion del 31 de mars passat a Tolosa pas sonque per aparar la lenga occitana mas per la Republica federala occitana. Logicament, serem a Barcelona lo 11 de setembre de 2012, còsta de nòstres fraires catalans. Doblidam pas que gràcia a eles avèm un govèrn occitan autonòm al Val d’Aran e que la varianta aranesa de l’occitan es oficiala en Catalonha ambe l’aprobacion de la lei de l’occitan, al parlament de Catalonha, a Barcelona, lo 22 de setembre de 2010.

Per nòstra preséncia, volèm dire a totes los catalans, que tant que demoraràn dins l’Estat espanhòl, an pas d’avenir coma pòble catalan liure e als occitans, d’origina o d’adopcion, que viscan en Occitània o dins la diasporà, que tant que demoraràn dins l’Estat francés, an pas d’avenir coma pòble occitan liure. Volèm conquistar lo poder en çò nòstre coma o faguèron los nacionalistas e independentistas catalans. Volèm per las regions occitanas los poders de la Generalitat per començar. Mas los catalans,eles,veson plan los limits de l’autonomia, subretot dins aqueste periòde de crisi economica e financièra. Vòlon anar mai luènh fins a l’independéncia dins Euròpa. Cada nacion definida per sa lenga a drech a son independéncia. Los catalans la vòlon lèu lèu e los occitans la voldràn un jorn. Lo camin de l’autonomia e un jorn de l’independéncia e de la creacion d’una Republica federala occitana, membre de l’Union europèa e de l’ONU es long e malaisit. Es pas una rason per renonciar.

Lo camin de l’independéncia de Catalonha es benlèu mens estrech mas lo poder de Madrid renonciarà pas aisidament. Li cal mostrar que i a una majoritat de catalans per l’emancipacion nacionala e que i a d’occitans que los sostenon e pas sonque al Val d’Aran.

Visca Catalonha liura, visca Occitània liura !  

Visca l’amistat e la solidaritat entre los occitans e los catalans !

Partit de la Nacion Occitana

10 carrièra de Romàs

47000 Agen ( Occitània )

+33 6 76 47 32 12