Aurore Martin : Lo País Basc amirat

comunicat
Lo País Basc amirat
 
Lo govèrn francés considèra lo País Basc, artificialament devesit entre l’Estat espanhòl e l’Estat francés, d’un biais tras que mesfisant.
Lo ministre de l’Interior, Manuel Valls, regeta la creacion d’una collectivitat territoriala basca en França, çò que per el seriá una prima versada a  l’ETA, mentre que la majoritat dels elegits, totas tendéncias confondudas, i es favorabla.
La militanta basca, de ciutadanetat francesa, Aurore Martin foguèt arrestada per la gendarmariá e liurada a la polícia espanhòla. Espanha aviá emes un òrdre d’arrèst europèu a son endrech per apartenéncia a Batasuna, movement illegal en Espanha mas legal en Francia. Aquel arrèstament d’autre biais causèt la colèra dels elegits del País Basc.
Mentre que ETA a renonciat a la violéncia e que las eleccions autonomicas al País Basc jos administracion espanhòla se son debanadas sens violéncia, es un plan marrit senhal adreiçat als bascs per las autoritats francesas.
Lo govèrn espanhòl acarat a la pujada de l’independentisme al País Basc e en Catalonha se crispa e lo govèrn francés se carcanha vesiblament de las repercussions possiblas sus son territòri.
Lo Partit de la Nacion Occitana es per la creacion d’una collectivitat territoriala al País Basc « francés » e dins la Catalonha Nòrd jos administracion francesa pels catalans. Un jorn vendrà que Catalonha e lo País Basc de l’Estat espanhòl seràn independents e aquelas collectivitats seràn vodadas a s’i restacar emai desagradèsse a nòstre fanfarron de ministre de l’Interior qu’empusa lo fòc que pretend combatre.
Lo Partit de la Nacion Occitana s’associa tanben a totas las voses que s’elevan per reclamar lo retorn d’Espanha d’Aurore Martin dont lo sol delicte es un delicte d’opinion.
  Lo 3 de novembre de 2012