Overblog
Editer l'article Suivre ce blog Administration + Créer mon blog

Rendut compte de l’Amassada de Tolosa del 25 de febrièr de 2012

Aquela novèla Amassada convocada per Guilhèm Latrubesse e David Grosclaude èra la seguida de la de Barbasta (Olt e Garona) del 10 de decembre passat. La tòca d’aquelas amassadas, es d’acampar los occitanistas, culturals e/o politics, encartats o non a l’entorn d’un manifèst amb l’idèa de presentar lo mai de monde possible a las eleccions localas de 2014. Erem 35 a la comuna annèxa del Pont de las Domaiselas amb de mond novèl qu’èran pas a Barbasta.

Lo P.N.O èra representat per Joan-Pèire Alari, co-president, Joanina Cazes-Grande, co-presidenta, Gèli Grande, clavaire, Joan-Luc Granet e Pèire Barral, co-president.

La còla de direccion del Partit Occitan èra representada per Guilhèm Latrubesse, conselhièr regional en Miègjorn-Pirenèus, David Grosclaude, conselhièr regional en Aquitània e Gustau Alirol, president del Partit Occitan e conselhièr regional en Auvernha.

Podèm pas citar totes los presents mas cal notar la presència de Rogièr Lassaque, president de l’ACEOC (Associacion dels elegits occitans)

-Per començar, Guilhèm Latrubesse fa un resumit dels acamps precedents e dels resultats. Nòta que los cinc conselhièrs regionals occitanistas son plan sols per intervenir sus totes los subjèctes. Es plan per aquò que cal anar mai luènh d’aquí l’idèa de la mesa en plaça d’una plataforma per aver d’influéncia sus la politica, sus la moneda tanben per las politicas lingüisticas de las collectivitats territorialas, per far avançar lo federalisme, l’autonomisme, lo drech a l’expression politica d’un espaci occitan. Nos cal bastir una dinamica amb una crida dins un tèxt amb d’objectius concrets.

L’organizacion serà a l’encòp piramidala e locala (cadun prendra en compte la situacion politica en çò sieu) per intervenir d’un biais novèl en politica.

La vision occitanista se pòt pas limitar a la lenga e a la cultura, deu i aver una vision occitanista de la mondializacion, de l’Euròpa. Pel moment lo pes dels partits politics occitans es limitat. Se tracha d’investir de luòcs ont sèm absents, d’analizar d’un biais occitanista los problèmas economics e socials. Prepausarem un modèl novèl ont la lenga aurà sa plaça. Cossí parlar als joves de mens de 20 ans qui son investits dins de grops culturals e son victimas de la despolitizacion ambienta ?

-David Escarpit pausa la question de saber que far concretament amb quins mejans e jos quala forma. Un participent vengut del monde de l’entrepresa parla de son experiéncia viscuda en Catalonha de l’Estat espanhòl e de la guèrra entre dos culturas, l’espanhòla e la catalana.

Cal evitar aquela mena de guèrra en çò nòstre segon el.

-David Grosclaude li respond que vivèm tròp sus las analisas de las annadas 1970. Los rapòrts amb l’entrepresa an cambiat e la societat catalana es pas la societat occitana.

Grosclaude ditz: soi una partida del pòble occitan ni mai ni mens. Es pas perque m’intèressi a la lenga e a la cultura occitana que soi un intellectual. Occitània aurà una realitat dins lo monde de deman amb de gent de mai d’una lenga e de totas las colors. Se cal rapelar quand Martí denonciava la Florida occitana am lo Motàs e lo Grau dau Rèi. Uèi se pot pas negar lor realitat umana. Vivèm coma tot lo monde dins la mondializacion. Tota la classa politica a son agach virat cap a París. Cossí fasèm per nos far entendre? O podèm far que localament. Se la LGV se deu far, nos intèressa mai d’anar lèu lèu de Bordèu a Niça puslèu que de Bordèu a París. Nos cal batre sul territòri occitan coma pel gas de sistre.

-Joanina Cazes parla de la preséncia d’occitanistas dins los collectius que se crean un pauc de pertot. La question es : qui organiza? Autrament riscam la dilucion. Cal tornar als movements de defensa del territòri.

-Grosclaude dona l’exemple de l’ensenhament de l’occitan : val mai èstre elegit dins un conselh municipal, subretot coma conse, per impausar la dobertura d’une classa bilingüa. Es mai eficaç que de manifestar davant las fenèstras de l’Inspeccion academica. Tota una tièra d’escambis seguís.

Començan per una intervencion pesuga sul colonialisme de França en Còsta d’Evòri e al Roandà.

-Pèire Barral fa remarcar que lo colonialisme ne patissèm nosautres d’abòrd : Occitània es una colonia francesa.

-David Grosclaude ditz que naturalament es anticolonialista mas que òm pòt pas o dire tot dins un manifèst.

-Gèli Grande afortís que nos cal en prioritat nos ocupar de nosautres per bastir l’Occitània de deman que degun o farà pas a nòstra plaça ajusta tanben David Escarpit.

-Ives Boissière interven sul sicut de l’occitan e de l’entrepresa per dire que globalament sèm pas pron presents.

-Nosella de l’IEO Gers vòl anar a l’encontre de las ressegas rapòrt a la preséncia dels joves. Sul terren, es en contacte amb eles.

-David Grosclaude per respondre a la remarca sus las manifestacions antioccitanistas ditz que se n’i a aquò pròva que fasèm de causas. Donc anem a l’accion concreta.

Se parla de la plataforma basca Batera (http://www.batera.info/ <http://www.batera.info/> ) per notar qu’es quicòm de conjonctural e que sas reinvidicacions (levat la co-oficialitat de l’euskera) es a dire essencialament la creacion d’una collectivitat basca especifica, son a mand d’èstre satisfachas.

Nosautres, partent del manifèst que coneissèm, avèm de redigir una Crida qu’auriá lo sosten dels partits politics occitans (serà dificil de signar per las organizacions culturalas occitanas) e que poiriam signar a títol individual. L’estructuracion en movement a l’entorn de la Crida se fariá mai tard, aprèp la redaccion.

-Pèire Còsta ditz que cal metre en plaça un rapòrt de fòrças e que se farà pas en crear una estructura nòvela.

Comença una discutida sus l’eficacitat d’elegits segon que sèm dins un vilatge, una vila mejana o granda. Qualqu’un soslinha que dins son vilatge te venon cercar per èstre conse. -Per David Grosclaude se i a 14000  municipis en Occitània e s’avèm 1 % d’elegits aquò fa una bona basa per trabalhar.

-Gustau Alirol pren la paraula per dire que serà pas aisit, es un trabalh de longa tòca perque nos cotam amb lo sistèma politic mai que mai en mitan urban. Pausa tanben lo problèma de la construccion europèa, que segon el avèm pas tròp soscat a l’Euròpa que volèm. De mai se volèm escampar lo partiment drecha-esquèrra nos anam amorrar. Se tracha pas de far de politica en despolitizar lo debat.

-David Grosclaude respond que vertat es qu’un elegit sol dins una municipalitat a pauc de poder (Còsta citava l’exemple de Tolon). Cal crear un malhum.

Justament qualqu’un pausa la question de l’ACEOC que son president Rogièr Lassaque es dins la sala. Lo problèma es que l’ACEOC a pas jamai agut de plataforma concreta. Las etapas seguentas Plataforma o crida d’adoptar al mes de setembre o d’octòbre qu’apelariam a signar e Congrès constitutui d’aquí a la fin de l’an. Serà le trabalh d’un Comitat de pilotatge que ne son membres :

Guilhèm Latrubesse / David Grosclaude / Rogièr Lassaque /Joan-Pèire Hilaire /Geors Nosella / Marie-Pierre Sclafer / David Escarpit /

-David Grosclaude confirma qu’anirà en Provença per la refondacion de l’occitanisme. Aquò per respondre a Anne-Marie Poggio qu’aviá dich que en Provença èran plan assabentats sus la demarcha.

Conclusion :

Nos sèm pausats la question entre nosautres del P.N.O de saber se podiam adopter lo manifèst que coneissetz tal coma es. L’ai criticat tanplan coma Joan-Marc Pellet e Pèire Barral. Mas coma ditz Grosclaude es pas la Bíblia mas sonca una basa de trabalh per fargar la crida e i a res dedins que siá cap e tot contrari a la doctrina del P.N.O. Fa que prenèm la responsabilitat de dire òc e d’anar endavant dins aquela entrepresa de refondacion de l’occitanisme que lo partit i es engatjat.

Joan-Pèire Alari lo 27 de febrièr de 2012

Partager cet article
Repost0
Pour être informé des derniers articles, inscrivez vous :