Mon prepaus es de denonciar las messorgas del Front Popular Novèl

            Aprèp las darrièras eleccions legislativas e aquò pendent de setmanas, l’esquèrra e l’esquèrra extrèma francimandas, recampadas dins lo Front Popular Novèl, nos eissordissián de longa en cridant sus las teuladas qu’èran lo primièr blòc politic a l’Amassada Nacionala. Una coalicion que voliá a tot pèrdre Lucie Castets, sa candidata, coma Primièra ministra. S’aquò èra estat i seriá demorada pas que qualques mesadas coma riscan de demorar en plaça quin Primièr ministre que foguèsse de quin blòc que siá. La reparticion dels deputats en tres blòcs màgers fa que matematicament tre que dos blòcs votaràn la censura, lo tresen passarà a la trapa. A n’aquel jòc avèm pas acabat, se ne vira, de véser los Primièrs ministres desfilar a Matinhon. Aquò risca de valsar al palais de Matinhon ! Un jòc ont nosaus, nacionalistas occitans, avèm malurosament res a ganhar ni a pèrdre, vist que sus l’escaquièr politic francés son totes jacobins manca dins lo grop LIOT (Libertat, Independents, Oltra-mar e Territòri) ont se tròban lo deputat breton Paul Molac, de nacionalistas còrses e autres deputats dels territòris insulars colonizats.

            Dempuèi aquelas famosas eleccions législativas dels 30 de junh e 7 de julhet de 2024, me soi tornat clinar, per fòrça, sus l’aritmetica. Alavetz, vos prepausi de tornar sus los grops politics representats a l’Amassada Nacionala. Son al nombre de onze. Dins un primièr temps los balhi per nombre d’importància en nombre de deputats :

Recampament nacional                                           126

Ensemble per la Republica                                        96

La França Insomesa                                                 72       

Socialistas e aparentats                                            66

Drecha (Los Republicans)                                          47                   

Ecologistas                                                              38

Los Democratas (MODEM)                                         36

Horizons                                                                  33

LIOT                                                                        22

Esquèrra Democratica e Republicana (comunistas)      17

Union de las Drechas (Eric Ciotti)                               16

            Se a n’aquestes ajustam uèit non escriches, aquò fa ben 577 deputats. Lo compte es bon. E ara, per avançar dins la demonstracion, fasèm la reparticion per blòc. Compte tengut que cadun s’acòrda per reconéisser que i a d’ara enlà tres blòcs a l’Amassada Nacionala, preni tanben aquela ipotèsi :          

Drecha extrèma : 126 + 16 = 142 deputats.

Drecha e Centre : 96 + 47 + 36 + 33 = 212 deputats.

Esquèrra extrèma e Esquèrra : 72 + 66 + 38 + 17 = 193 deputats.

            Alavetz, se los del Front Popular Novèl avián saput comptar, se serián mainat lèu-lèu que lor blòc es pas lo blòc majoritari coma o cridèron e contunhan d’o cridar malgrat l’evidéncia de las chifras. Amb 212 deputats es plan lo blòc de drecha e del centre qu’es majoritari. Atanben, condreitament, lo President de la Republica, qu’el sembla saber comptar, se daissèt pas enganar pels guissals e la furor del FPN. Designèt logicament una persona eissida d’aquel blòc.

            Vertat es que los tres blòcs èssent pauc o pro de fòrça egala, la designacion d’un Primièr ministre dins un camp o un autre cambia pas grand causa. Basta pas qu’una mocion de censura siá votada pels dos autres grops (emai foguèsse pas, solide, per las meteissas rasons) e pataflau ! lo govèrnament es pel sòl. Sabèm pas encara çò que nos resèrva de suspresas la politica a París, e francament me’n chauti bravament, mas la classa politica francesa èssent pas acostumada a la cultura del compromés al cas per cas, l’espectacle risca d’èsser pivelant, emai bofejant.

            Mon prepaus es de denonciar las messorgas del Front Popular Novèl que pendent de temps, ni per téner compte de l’aritmetica, ensagèt de far créire al monde qu’èra lo primièr blòc a l’Amassada Nacionala. Benlèu pensa que lo blòc « Drecha e Centre » amb Los Republicans e los centristas es pas un blòc pro omogenèu per governar amassa ? Mas alara que pensar del Front Popular Novèl que recampa a l’encòp los islamo-esquerristas del partit melenchonista (fasent son mea culpa lo quiti François Ruffin a denonciat publicament lo racisme de LFI) e los social- democratas del Partit Socialista ? Un governament d’aquela coalicion, que benlèu es per venir (se cal d’ara enlà esperar a tot), seriá estat un circ de tria.

            L’esquèrra, e encara mai l’esquèrra extrèma, es acostumada a mentir. La messorga es son credo. A pas jamai sabut far res mai que messorguejar. Ieu me soveni de « la reparacion istorica » promesa als pòbles colonizats de França pendent las campanhas electoralas d’abans 1981. Foguèt pas jamai qu’una promessa e una messorga de mai. Dempuèi soi vaccinat contra los partits politics franceses.

            Per illustrar la falsetat del Front Popular Novèl m’agrada de parodiar una de las cançons de Claudi Sicre e sos fabuloses trobadors. Ai ieu tanben enveja de cantar, per un còp en francés al rebat del cantaire tolosan :

Tout jacobin ment,

De Mitterand à Olivier Véran,

De Chevènement à Antoine Armand,

La Droite ment fréquemment,

La Gauche ment énormément

Il n’y a que ma maman,

Qui ment rarement.

              Sèrgi Viaule