Letra de l'Amassada occitana Valadas

Lo Partit de la Nacion Occitana saluda l'iniciativa dels militants de "l'Assemblada occitana Valadas" de se sasir del malcontentament de las populacions occitanas de las Valadas Occitanas de las províncias italianas d'Imperia (region Liguria), Coni e Torino (region Piemonte) davant l'abséncia de responsa a lors reivindicacions pròpias de las autoritats provincialas, regionalas e estatalas. Aquelas autoritats, supausadas los representar, se determinan pas qu'en foncion de las politicas dels partits nacionals e centralistas italians, e oblidan los besonhs particulars de las populacions, sustot en tèrmes de dialòg transfrontalièr, dins lo domeni dels transpòrts.

Reclaman donc la constitucion d'una "província autonòma", coma o prevei la constitucion italiana, un estatut d'autonomia dont benefícian ja d'autras regions e províncias de l'"Arc Alpin" - la Val d'Aòsta, lo Sud-Tiròl, lo Friol. Se prepausan sustot de participar a las venentas eleccions europèas dins l'encastre d'una aliança electorala, lo "Pacte Autonomia e Environament", portaire de reivindicacions comunas, identitàrias e ecologistas.

Lo Partit de la Nacion Occitana saluda particularament aquela iniciativa, que fach resson a aquela, dins l'Estat francés, de la FPU (Federacion dels Païses Units) dont lo PNO es membre, dins l'aliança electorala EPT (Ecologia Positiva e Territòris).

Recebèm e publicam la letra de l'Amassada occitana Valadas

Fòrça gents se demandan uèi perqué nòstras valadas semblan èsser estadas "oblidadas" per la politica que compta, e nosautres, de l'Assemblada Occitana Valadas, nos sèm egalament pausat la question e nos sèm fach una opinion.

Nòstras valadas comptan pas al nivèl politic, an de representants plan valables a Roma e a Turin, mas malurosament aqueles representants institucionals an fach la causida d'èsser amb los partits nacionals e centralistas en plaça de causir de defendre lors territòris, daissant als administrators locals la tasca ingrata e complicada d'escotar e d'èsser los pòrta-paraulas dels besonhs de las populacions localas.

Las valadas occitanas poirián èsser la Val d'Aòsta de Piemont, mas per obtenir de resultats cal sortir de la logica segon la quala sol lo centre (Roma, Turin e dins d'unes cases Coni) nos protegís, mas devèm aver lo coratge de dire que sèm un territòri completament a despart amb de besonhs particulars que pòdon pas èsser satisfaches qu'amb una autonomia a l'imatge de la Val d'Aòsta !

Lo Pacte per l'autonomia e l'environament, qu'a l'intencion de se presentar a las eleccions europèas e dont l'Assemblada occitana valadas es membre, prepausa exactament lo bon projècte pels nombroses problèmas a los quals nòstras valadas son confrontadas.

Las valadas occitanas devon, per subreviure als nombroses eveniments negatius que los an afectadas pendent las 50 darrièras annadas, se constituïr en província autonòma, e aquela província se deu egalament veire atribuïr las competéncias en matèria de dialòg transfrontalièr, e mai sus de questions importantas e fondamentalas talas coma los transpòrts. Se Roma es pas interessada pel renovelament de l'acòrdi de Coni-Niça, la província autonòma occitana deu aver la capacitat d'o far.

Ne va tot parièr pel fulheton del tunèl de Tenda e de la varianta Demonte. Es lo territòri que deu decidir. Cal que nosautres, abitants de las valadas  decidiscam !

Tròp sovent los politics se rebremban pas de nòstras valadas qu'al moment de la campanha electorala, moment ont totòm ven prepausar çò qu'es irrealizable e nos dire de nos calar, benlèu quitament en nos onchant la man pendent la campanha !

Occitans, es temps de dire pro ! Unissèm e reivindiquem çò que la Carta de Chivasso nos balha de drech. La província autonòma occitana. Per nòstre avenidor ! Per l'avenidor de nòstras montanhas