Podèm pas daissar Ucraïna sola se sacrificar per nòstra libertat

23 Janvier 2024

Pel ben de l’umanitat

i a urgéncia de batre lo predator paranoïc qu’es Potin

Dempuèi la casuda de l’Union sovietica, la Federacion de Russia, de mai amb l’arribada de Potina al poder, arrèsta pas de rosegar sos paises vesins. I agèt primièr, tre 1992, la man mesa de Moscó sus l’Ascasia, territòri autonòm de Georgia que jos la constrencha de Russia declarèt unilateralament son independéncia. Mas d’independéncia per Ascasia, n’i a evidentament pas ges. Lo territòri es vengut ni mai, ni mens, una colonia de Russia. Puèi i agèt las guèrras de Chechenia. Emai se del punt de vista del drech internacional, aquela nacion èra enclausa dins la Federacion de Russia, empacha pas que d’un punt de vista etnista, la nacion chechena a drech a son independéncia. Independéncia d’alhors ganhada a la fin de la primièra guèrra de Chechenia (1994-1996).

I agèt tanben en 2008 l’occupacion d’Ossetia del Sud per las armadas russas. Aquí tornamai una part bèla del territòri georgian foguèt victima de l’imperialisme rus. Al lòc de poder obténer la reunificacion e l’independéncia de lor país, los Ossèts son ara entièrament colonizats pels Russes. Un empèri rus que de Sant Petersborg fins a Vladivostòc regna sus una multitud de nacions colonizadas.

L’ogre rus a un apetís inagotable. Atal tre 2014 envasiguèt Crimèa e sostenguèt los secessionistas russofònes de Donbàs (russes immigrats en Ucraïna al moment de l’URSS per far virar l’industria metalurgica e las minas del país). Mas la Russia de Potin ten fòrt e mòrt a s’acaparar totes los paises eslaus e doncas considèra Ucraïna coma una marga de sa fantasmada Granda Russia. Alavetz, sabèm totes cossí, lo 24 de fevrièr de 2022, lo dictator mandèt sas armadas sus Kiiv. Son obesession es de sometre la nacion ucraniana, deguèsse per aquò sacrificar de centenats de milierats de Russes e d’Ucranians. Aquela guèrra expansionista d’una autra edat, s’addicionam los dos costats, a ja probablament fach 500 000 mòrts e nafrats. En 2022 lo President ucranian e son governament avián prevengut de l’imminenta invasion russa mas, nimai pels precedents en Ossetia, Crimèa e Donbàs, los Europèus virèron lo cap.

Dire que lo dictator de Moscó es un psicopata seriá exagerat ? de cap de biais ! Son comportament irracional es aquí per provar lo contrari. Los patetics trecimacis del President francés a la debuta de la guèrra i faguèron pas res. Çò pus grèu, me sembla, es que los bailes de las democracias occidentalas ajan pas pres la mesura de la situacion. Refusèron d’admetre que Potin coneissiá pas que la politica de la fòrça e de la terror. Pausi la question : que fasián los analistas dels servicis d’entresenhas ?

Coma o an revelat los observators mai avisats : Potin a totjorn fach çò que ditz. E qu’a dich lo dictator parano-sanguinari ? A dich qu’Ucraïna èra part compausanta de Russia e que d’un biais o d’un autre tornariá al sen de la Granda Sòrre eslava. Dempuèi de temps es la pròva que coneis pas que la lei del mai fòrt. Aprèp tantes crimis de guèrra e crimis contra l’umanitat, qu’espèran las democracias per arrestar lo monstre e lo rebutar al dintre de sas pròprias frontièras. Pels inconscients que parlan de negociar amb Potin, la responsa es venguda de l’ancian ambaissador rus en França sus la cadena de television LCI lo dijòus 18 de genièr de 2024 : « La sola causa qu’avèm de negociar amb los Ucranians es lor capitulacion ».

Cada arpent de tèrra ucraniana ocupat deu èsser desliurat. En ajudant a liberar Ucraïna de l’ocupacion russa es sa libertat qu’Euròpa garantís. Malurosament totes los bailes dels païses europèus an pas mina d’aver pres la mesura de l’enjòc. Dos ans aprèp la debuta de las ostilitats, las democracias contunhan d’ajudar Ucraïna amb parsimonia. Se diriá qu’an pas consciéncia qu’en ajudant Ucraïna s’aparan de la furia potiniana. A voler comptar cada euro que balham a lor vesina, a li voler comptar cada obús, la mesquinariá risca de lor costar car. Se perdèm Ucraïna ont s’arrestarà lo dictator ? A la paret de l’OTAN ? Qual o poiriá afortir amb certesa ? L’imperialisme a pas de termièra e o sabèm ben pro nosaus Occitans.

Coma o ditz condreitament lo President Volodimir Zelenski, en defendent lor país de l’agression russa, Euròpa tota se para dels Russes. Alavetz, dins aquelas condicions perqué trastejar per balhar a n’aquel valorós pòble totas las armas necessàrias que li permetrián de metre l’enemic defòra ? Perqué lo daissar pas bombardar las installacions militaras russas en Russia alara que l’armada russa bombarda la quita populacion civila en Ucraïna ? D’un punt de vista militar aquò es completament insostenible, emai insuportable. Perqué las democracias an pas balhat l’an passat a Ucraïna çò que li caliá per capitar son ofensiva e botar l’enemic fòra país ? Quines son aqueles calculs machiavelics, machiavelics e suicidaris ? Cossí se pòt que Russia capitèt de se virar en economia de guèrra e pas Euròpa ?

Pas que per prene lo cas de França, se sap qu’aquesta a dins sos cobèrts quinze avions de guèrra Mirage de disponibles. D’avions que son estats desclassats recentament. Qu’espèra França per los mandar a Ucraïna ? Se ditz que las resèrvas de pèças de recambi son pas pro fornidas. Mas seriam pas capables en Euròpa de tornar usinar de peças ja fabricadas ? E que dire dels avions que devián èsser fornits e qu’o son totjorn pas ? La formacion dels pilòtes explica pas a n’ela sola los retards. Al contrari ! amaga una manca cridanta de volontat politica.

Segon los especialistas, sonque la mitat de çò qu’es estat promés a Ucraïna li es arribat. Meteissa causa per las ajudas financièras. Que siá als Estats-Units o dins l’Union Europèa, son los aleàs mesquins de la politica politiciana qu’empachan de desblocar los crédits promeses. Aquelas inconsequéncias riscam de las pagar un jorn. Dins aquela guèrra d’agression, cada ora compta.

Pendent que de politicians se cercan bregas dins d’emicicles calfats, sul front ucranian d’aparaires de la democracia morisson dins d’òrras condicions. D’un autre latz se ditz que l’armada ucraniana seriá a mancar de combatents. Perqué pas renfortir las legions internacionalas d’aparaires de la democracia ja sul terren ? A la debuta de la guèrra qualques òmes se portèron volontaris. Ont ne sèm del recrutament de volontaris ? Semblariá qu’aquò siá un secret militar. Secret militar o pas, me sembla que las legions internacionalas poirián èsser la solucion a la manca d’efectius. Podèm pas daissar Ucraïna sola se sacrificar per nòstra libertat. O torni escriure en gras : Podèm pas daissar Ucraïna sola se sacrificar per nòstra libertat.

Sèrgi Viaule