Overblog
Editer l'article Suivre ce blog Administration + Créer mon blog

Anna-Maria Poggio, l’eficacitat militanta personificada

            Fa mai de cinquanta ans que soi sòci de l’Institut d’Estudis Occitans a per tan luènh que me pòsca remembrar, i ai totjorn conegut Anna-Maria Poggio. Es estada una militanta culturala de tria. Trabalhava sens bruch amb una eficacitat exemplària. Èra d’una granda discrecion e modestia, totes los que l’an costejada o sabon ben pro. Amb ela avèm totjorn agut una complicitat particulara. Aviam pas besonh de nos parlar per nos comprene. Aviam la meteissa concepcion del militantisme occitanista. Èrem de los que tiravan directament endavant, sens anar quèrrer lo nas darrèr l’aurelha.

            Parli malurosament al passat d’Anna-Maria Poggio. Veni d’aprene que nos ven de quitar, un còp mai dins la discrecion que la sabiái pas malauta. Se n’es anada sus la punta dels pès, sens bruch. M’estona pas d’ela. Jamai cerquèt pas ni onor, ni tribuna, sonque far avançar lo let. La crosavi cada an a l’Universitat Occitana d’Estiu de Nimes ont anava regularament. Veniá tanben a Rodés per l’Estivada.

            Anna-Maria Poggio èra una valenta demest las valentas. Ja annadida e patissent una santat trantalhanta esitava a traversar Occitània per balhar la man aicí o ailà. Imaginatz, partissiá de Provença per venir a Puèglaurenç (Albigés) fa l’inventari dels libres d’IDECO, lo servici edicion de l’Institut d’Estudis Occitans. Agèri lo plaser de lo far mantunes còps amb ela. Es un trabalh fastigós que se fa dins l’ombra e qualques còps dins lo freg de l’ivèrn. Ni per aquò Anna-Maria se planissiá pas jamai. Traversava una brava part del país per s’aquitar d’aquesta ingrata tasca. Trastejava pas ni se pausava pas de questions : se i aviá quicòm de far, o fasiá sens trigar. Balhava l’exemple e tirava lo monde endavant. Aquí la valentiá d’Anna-Maria.

            E sempre la coneguèri amb una imbrandabla bona umor e una riseta suls pòts. Presava galejar. Èra una persona d’una granda umanitat. Positiva se se’n podiá pas mai. S’endeveniá amb totas las gents de bona volontat. Èra optimista e aquò tanben es una qualitat que compta per caminar cap al solelh. Occitania a perdut una obrièra de tria e ieu una meravilhosa amiga. Per ela e per totes los que nos quitan d’aquestas passas, contunharèm fins a la libertat.

            La redaccion del Lugarn se junh a ieu per adreiçar d’unas condolenças atristesidas a la seu familha.

            Sèrgi Viaule

  Anna-Maria Poggio  se n’es anada sus la punta dels pès, sens bruch
Tag(s) : #in memoriam, #Tot en Oc
Partager cet article
Repost0
Pour être informé des derniers articles, inscrivez vous :