Overblog
Editer l'article Suivre ce blog Administration + Créer mon blog

Joanina Laus nos ven de quitar

 

            Joanina Laus desfuntèt a-z-Albi lo 16 d’agost de 2021. La patria occitana ven de pèrdre, tornamai, una de sas valentas filhas. Nascuda en França, de prima pausa Joanina èra pas ges estada programada per venir occitanista. Mas, la vida estant çò qu’es, venguèt viure e trabalhar a-z Albi. Atal descobriguèt la cultura e l’identitat nòstras. Aprenguèt la lenga tan plan que la parlava coma s’èra sortida d’una familha enrasigada. Faguèt onor a son país d’adopcion fins a n’aquesir la cultura. Coma qué, malgrat l’opression coloniala, Occitània es encara capabla d’integracion. O es per pauc que las gents vengudas d’endacòm mai ajan enveja de s’integrar.

            Mas Joanina s’acontentèt pas de parlar la lenga, l’escriviá tanben. Emai ne demorèt pas aquí. Prenguèt de responsabilitats dins las associacions occitanistas d’Albigés, fins a venir presidenta, pendent d’annadas, de la seccion departamentala de l’Institut d’Estudis Occitans. Participèt tanben activament al cèrcle local IEO d’Albi e a Ràdio Albigés. Foguèt una militanta eficaça amb la quala totòm aviá plaser de trabalhar. Desvolopèt de longa una energia estrambordanta al servici de la lenga e de la cultura nòstras.

            Foguèt una femna d’una umilitat tan bèla coma son vam èra preciós, comunicatiu e generós. Se tenguèt totjorn al service de la tòca e unicament al servici de l’objèctiu que perdiá pas jamai de vista : Far tot per ensajar salvar e promocionar l’identitat occitana. Aquò’s lo pròpri de las gents desinteressadas e pragmaticas d’òbrar pel ben comun. Es estada d’una constanta sens bòla.

Sebelida lo dimercres 18 d’agost de 2021, daissa un vuèg dins lo mitan occitanista albigés. Joanina Laus èra l’esposa de Cristian Laus, escrivan e lexicografe, defuntat en 2002. A sos enfants e felens, coma a tota sa familha, Lo Lugarn e lo Partit de la Nacion Occitana presenta- sas condoléncias atristesidas. Òc-ben, la patria occitana ven de pèrdre, tornamai, una de sas valentas aparairas. Per onorar sa memòria, per que tota l’energia que nos ofriguèt demòra pas sens endemans, nos devem de contunhar lo combat.

Joanina Laus / Jeannine Laux

Joanina Laus / Jeannine Laux

Tag(s) : #Actualités, #Tot en Oc
Partager cet article
Repost0
Pour être informé des derniers articles, inscrivez vous :