Overblog
Editer l'article Suivre ce blog Administration + Créer mon blog

Covid-19, qualques estadisticas en passant

 

            Sabi pas vos, mas ieu pòdi pas mai agachar los mèdias franceses. Me dirètz qu’aquò data pas d’uèi, mas fan pas en s’arrengant. D’ont mai va e d’ont mai lo parisianisme vira en redond. Talament que riscarián de prene lo caluquitge ? Non pas ! Cresi que calucs de cròia o son dempuèi de temps. D’ara enlà, e quand disi « d’ara enlà » aquò fa un an e mièg qu’aquò dura, sabon pas parlar de res mai que de la marrana de la covid-19. Amb aquò res mai. Coma se i aviá pas mai de problèmas de democracia en Euròpa e dins lo monde, ni mai d’injustícias socialas sus aquesta planeta. Coma se i aviá pas mai d’afaristas e d’especulators que contunhèssen de se’n metre plen las pòchas mentre que d’autres son al caumatge e obligats d’anar dormir jols ponts, fauta de se poder metre una teulada sul cap. O disi sens engambi, aquela propaganda estatala autocentrada es un escandal vertadièr. Aqueles mèdias a la bòta del poder francés son de longa a encloscar lo monde per los anestesiar cerebralament. L’accion de propaganda es ja vièlha qu’existissiá jos l’empèri roman e benlèu abans. La tòca es de fabricar de robòts, de bons pichons soldats prèstes a s’anar far tuar e traucar la codena tanlèu que París ne balha l’òrdre. Avèm ja viscut aquela mena de preparacion psicologica faissista entre las guèrras de 1870 e 1914.

            Las gens son ara quasi completament condicionadas. Escarses son los resistents a n’aquel òrdre bonapartista, e doncas dictatorial. Poder despotic qu’edicta de mai en mai de leis liberticidas coma per exemple (entre plan maitas) l’empacha de l’ensenhament de la lenga occitana per immersion. Malurosament Aldous Leonard Huxley a pas res inventat. Mai la populacion ven nombrosa sus la planeta e logicament mai las libertats individualas demesisson. Es directament proporcional e lo fenomèn va créisser amb l’augmentacion de la populacion.

D’aquestas passas, França es lo país qu’a mes en plaça l’ausweis sanitari lo mai liberticidi, repressiu e segregacionista de la planeta. Amb aquò los resistents a n’aquela pèrdia de libertats son pas plan nombroses a manifèstar per carrièra. Los qu’an causit de se far pas vaccinar son estigmatizats, emai persecutats. Coma jos quina dictatura que siá, an paur !

Ara qu’urosament las vaccionacions existisson e que cadun pòt causir de se protegir o pas, perqué descriminar los que prenon lo risc per eles, e pas que per eles, de se protegir pas ? Perqué se seriá interdich lo maridatge omosexesual alara qu’aqueste empacha pas lo maridatge eterosexual ? I auriá pas pro de plaça sus aquela planeta per los omosexuals e pels eterosexuals ? Perqué los Franceses empachan dempuèi de sègles los Occitans de parlar lor lenga dins lor país ? I auriá pas sus aquela planeta pro plaça per totas las nacions ? En tota coneissença dels dangièrs de la covid-19 e dels apleches qu’avèm ara per nos protegir i auriá pas pro de plaça pels vaccinats e pels non vaccinats ? Qual sap ? Perqué obligar las gents de se far vaccinar mentre que degun empacha pas las autras d’o far tant que vòlon ? Se lor còs aparten a los qu’an decidit de se far vaccinar per se protegir, lor còs aparten tanben a los qu’an decidit de prene lo risc d’o far pas. Es pas vertat que los que se fan pas vaccinar fan prene de riscas sanitaris als qu’o son, se que non a qué serviriá de se far vaccinar ? Aquí comença -s’èra pas ja començada dempuèi de temps dins d’autres domèni e mai que mai lo de l’imperialisme- la dictatura. Se la libertat de cadun s’acaba aquí ont comença la dels autres, la libertat dels non vaccinats entrava pas la libertat dels vaccinats. Los que cridan uèi a l’obligacion vaccinala contra la covid-19 e qu’o dison obrar per lo ben de la nacion francesa son los meteisses que son per l’obligacion de la lenga francesa totjorn dins l’ « interés superior de la nacion francesa ». Son los partidaris de l’uniformisacion a tot pèrdre e jos la constrencha.

            E ara ensaget de prene un pauc de nautor. Ont se sèm de la marrana de la codid-19 de pel monde ? Me soi amusat d’agachar las estadisticas. Coma aviái léser me soi pensar de prene un país de cada continent per véser se l’umanitat èra pas en dangièr d’extincion. Emplegar aquela expression de « dangièr d’extincion » es pas exagerat per lo qu’agachariá pas que los mèdias franceses, solide aqueste poiriá pensar que vertadièrament anam cap a un escantiment de l’umanitat. Per aver una idèia franca de çò que se passa dins lo monde a prepaus de la covid-19 prenguèri adoncas a l’azard (a despart per Euròpa) un país sus cadun dels cinc continents. Per Euròpa prenguèri França per tant que sèm concernits per las decisions presas pel poder parisenc, un dels mai autoritaris del monde. Per America prenguèri Cuba, per Africa la Republica Democratica del Còngo, per Oceania l’Estat mai poblat per dire que las estadisticas vòlgan dire quicòm, valent a dire Australia e per Asia prenguèri arbitrariament Laos.

            La chifras que balhi aicí, las ai pas inventadas, son estadas trobadas sus Internet. Cadun pòt anar verificar. Lor datas de publicacion son de qualques setmanas e de tot biais de donadas coma lo nombre dels vaccinats e lo nombre dels mòrts càmbia de longa. Es un imatge pres un moment donat que balha una idèia de la pandèmia. Alavetz, un còp aver balhat aquelas chifras ne tiri pas de conclusion que las situacions pòdon evoluir e quitament evoluir lèu-lèu. Aquí, per simpla curiositat çò que las estadisticas me dison :

- Per çò qu’es del Laos : nombre d’estatjants : 7 milions 379 mila. Nombre de vaccinats (entendre la vaccinacion completa quand balhi lo nombre dels vaccinats) : 833 mila ; siá 11,6 % de la populacion. Nombre de mòrts : 6 ; siá 0,00008 % de la populacion. Aquò fa quitament pas un mòrt per million d’estatjants. Un còp qu’aurem dich que lo país es gaire estat tocat per la marrana aurem tot dich. Si !.. Podèm ajustar que lo país a trobat los mejans financièrs de far vaccinar 11,6 % de sa populacion.

- Lo cas de la Republica Democratica de Còngo es particular per çò qu’es l’exemple del fach que lo continent african dins sa part sudsaariana sembla l’airal de la planeta mens tocat per la pandèmia. D’efièch, per 92 milions e 378 mila estatjants e amb un nombre de vaccinats a sonque 4260 (la chifra pareis incredibla mas es per çò que la campanha deguèt començar tardièrament), siá 0,004 % de la populacion, lo país compta pas que 1045 mòrts amb una demografia, tornem o dire, de mai 92 milions d’estatjants, siá 0,001 %.

- Australia, per 25 milions e 788 mila estatjants, a vaccinat 4 milion 140 mila personas, siá 16,3 % de la populacion. Son comptador macabre pòrta 927 mòrts, siá 0,003 de la populacion. Malgrat que la pandèmia siá pas estada plan letala, lo país enancèt una campanha de vaccinacions pro consequenta. Es un país qu’a los mejans financièrs per investir dins la prevencion.

- Cuba es estada plan mai tocada per la marrana. Amb una populacion de 11 milions et 317 mila estatjants an vaccinat 23,7 % de las gents, siá 2 milions 680 mila Cubans. Agèron un nombre pro consequent de mòrts amb 2 492 decèsses deguts a la covid-19 al moment ont las chifras que vos balhi son estadas publicadas, siá 0,022 % de la populacion.

- En França, las chifras pescadas sus Internet son las seguentas al moment ont las trobèri. Nombre d’estatjants : 65 milions e 426 mila. Nombre de vaccinats : 32 milions e 900 mila ; siá 49,1 % (ara las chifras an pujat). Lo nombre de mòrts s’enauçava a 111 695 ; siá 0,170 de la populacion. Aquelas chifras mòstran que la pandèmia es estada mai letala en Euròpa qu’endacòm mai. Perqué ? Cossí ? O sabi pas dire, mas curiosament lo coronavirus sembla s’atacar mai marridament als païses rics. I deu ben aver de rasons societalas a n’aquò. Las gents son mai mobilas en Occident ? Es una ipotèsi avançada per d’unes.

            Çò que ieu remarqui amb aquelas chifras e sens de tirar de conclusions ativas es que los paises qu’an agut mai de mòrts son los qu’ara vaccinan mai (quand n’an los mejans, plan solide). An paur e per capitar lors campanhas fan paur a las populacions. Aquí las chifras :

França : 49,1 % de vaccinats e 0,170 % de mòrts (un taus de mortalitat dels mai nauts de la planeta).

Cuba : 23,7 % de vaccinats e 0,022 % de mòrts (aquí tanben un nombre naut).

Australia : 16,3 % de vaccinats per 0.003 % de mòrt, (lo país se’n tira plan).

Republica Democratica de Còngo : 0,004 % de vaccinats (tant val dire degun al moment ont ai la chifras) per 0,001 % de mòrt. L’Africa centrala sembla èsser estada esparnhada. Amb tan pauc de mòrts es pas estonant que las autoritats politicas del país se sián pas ronçadas suls vaccins, sens comptar qu’èra tanben certanament una question de moneda.

E Laos dins aquò ? 11,6 % de vaccinats per 6 mòrts, siá, tenètz-vos plan, 0,00008 %.

            Aquí son de chifras e pas que de chifras. Las vau pas interpretar que ne soi incapable e me demandi se qualqu’un ne seriá capable. Semblariá que siá dins la natura dels viruses d’anar aquí ont vòlon, mas totjorn portats de vectors umans o animals. Mentretant, las chifras que reteni ieu e que degun deuriá pas pèrdre de vista es que la pandèmia faguèt fins ara (en un an e mièg) 4 milions 270 mila mòrts sus una populacion mondiala de 7 miliards, 874 milions, 966 mila estatjants. Cal totjorn téner aquelas doas chifras en regard. Quantes de mòrts degudas cada an a l’alcoolisme dins lo monde ? Mai de tres milions dison las estadisticas. Quantes de mòrts cada an de malnutricion sus la planeta ? Responsa, un million. Quantes de mòrts per la gripa sus la planeta cada an ? La chifra es de mièg million. Es per una pandemia que faguèt 4 milions de mòrts sus la planeta e qu’ara podèm mestrejar de mercés als vaccins, que França me discrimina. Es per aquò que me secuta e me priva de mas libertats fondamentalas. I agèt pas d’autras pandèmias proporcionalament mai murtrièras sus la planeta dins l’Istòria ? Si-ben-tant ! Per memòria remembri que, cent ans fa, la gripa dicha espanhòla faguèt de 20 a 50 milions de mòrts segon l’Institut Pasteur, e benlèu fins a 100 milions segon cèrtas reevaluacions de 2020, çò que fasiá a minimà 2,5 % de la populacion terrèstra e 5 % al maximum. Raportat a d’uèi fariá 200 a 400 milions de mòrts. Mas urosament aquò’s lo passat.

Malgrat los vaccins per totes los que se vòlon protegir, coma a un pestiferat, França me vòl impausar un ausweis. Deman me farà portar la crotz occitana jauna sul revèrs lo còl de ma vèsta ? Aquò o refusi e teni qu’aquò se sàpia. Mon còs m’aparten tanplan coma aparten a cadun de nosautres.

 

          Sèrgi Viaule

 

Nòta de la redaccion : La redaccion del Lugarn torna remembrar que coma o exprimís clarament l’expression « tribuna liura », los tèxtes publicats jos aquela denominacion son totes signats e engatjan pas que lors autors.

 

Covid-19

Covid-19

Tag(s) : #Actualités, #Covid-19, #Tribune libre, #Tot en Oc, #Sèrgi-Viaule
Partager cet article
Repost0
Pour être informé des derniers articles, inscrivez vous :