Rodez, Estivada 2021. L'Estivada 2021 es estada una tinada mejana

Una Estivada 2021 entre luna e solelh

            L’an passat, per encausa de la marrana de la covid-19, l’occitanisme que bolèga foguèt privat d’Estivada. Pas res a dire a n’aquò que foguèt malurosament pas lo sol festenal que foguèt annulat. Ongan agèrem paur. L’interdiccion menacèt un brave moment la manifestacion. Finalament, de mercés a la comuna de Rodés, se poguèt debanar del 22 al 24 de julhet. Disèm « de mercés a la comuna de Rodés » per çò qu’aquesta auriá pogut, al nom de precaucions demasiadas e injustificadas, getar l’esponga coma se ditz en espòrts. Fin finala lo daissa-passar sanitari foguèt obligatòri pas que per assistir als concèrts qu’ongan se debanavan sus la plaça Foch.

            La primièra causa qu’es de regretar per aquela edicion de l’Estivada es que las manifestacions culturalas se debanavan dins pas mens de uèit endreches diferents que d’unes èran pro excentrats del còr de la Ciutat. Perqué aquel esclatament geografic ? Nos foguèt dich qu’èra per encausa que i aviá d’òbras sus l’emplaçament costumièr. De fach, poguèrem constatar de visu que, s’efectivament i aviá d’òbras dins lo quartièr, aquò’s èra darrèr la granda sala festadièra ont se tenián autres còps lo salon del libre e la sala de premsa. A nòstre vejaire aqueles trabalhs geinavan pas ges lo debanament del festenal, mas benlèu avèm pas totes los elements per ne jutjar. Cossí que ne vire, lo fach que lo festenal èra ongan espetat en mantunes endreches, aquò se compren, perturbèt son debanament. Per balhar pas qu’un exemple, la distància èra bèla entre lo salon dels editors que se debanava a l’Ostal de la comuna e los recitals de poësias que se debanavan eles als Archius departamentals. Per navegar entre totas las manifestacions propausadas, los festenalièrs aurián degut se desplaçar en bicicleta. Aquel esclatament faguèt que, pauc o pro, i agèt mens de public per cada espectacle. E qué dire del salon dels editors que se tenguèt al primièr e segond estatges de l’Ostal de la comuna, tant val dire dins un cuol-de-sac ? Lo que volguèt vertadièrament se téner al fial de l’actualitat editoriala e participar als aperitius literaris deguèt far un esfòrç bèl per trobar e pujar fins al salon dels editors. Rai ! nos demòra pas mai a esperar que l’an que ven lo festenal se tornarà concentrar sus un sul e unic luòc.

            Me sembla tanben qu’ongan, a l’andicap de l’escampilhament geografic s’es vengut ajustar un deficit de publicitat. D’efièch, ai pas vist en vila una sola aficha anonciant la manifestacion. La premsa a pas tanpauc anonciat l’eveniment coma o s’ameritava. Vertat que i a un ostracisme politic e patologic d’aquesta per çò que tòca a l’accion occitanista, mas benlèu que los organizators an pas fach ongan çò que fasián las annadas precedentas per far conéisser lo festenal. Volèm pas far de paranòia inutila ni far de complotisme bon mercat mas nos podèm pas tirar de l’esperit que se i a mens de publicitat de facha a l’entorn de l’eveniment i aurà forçadament mens de public e se i a mens de public lo festenal ven sens interés. Ite missa est. Tiratz-vos que i a pas res pus a véser…

            Mentretant, malgrat totas aquelas empachas, lo millesime 2021 de l’Estivada es estat d’una pro bona tenguda. Se la programacion sus la scèna granda es estada inegala, d’unas prestacions artisticas son estadas seguidas per un public nombrós malgrat las condicions particularas degudas a l’obligacion del daissa-passar sanitari obligatòri.

            Ongan lo vilatge associatiu se teniá sus la plaça de la Ciutat. Un endrech comerciant fòrça passadís ont los Rodesòls coma los toristas van e venon. Demest las cabanetas mesas a disposicion de las associacions mai activas d’Occitània, se trobava, plan solide e coma cada an, la nòstra, la del Lugarn. Foguèt per nosaus l’escasença de far conéisser nòstres mèdias (revista papièr e blòg) al public. L’ocasion tanben de li presentar lo programa politic del Partit de la Nacion Occitana. Pendent aquestes tres jorns d’Estivada un desenat de militants vengut dels quatre caires del país se son relevats per recebre las gents. Aquel trabalh de respondre a la curiositat del monde per çò que tòca a l'accion politica es per nosaus indispensable. Contunham de pensar que vist la situacion de denegacion identitària que patissèm se pòt pas enfaciar l’accion occitanista pas que sul versant cultural. D’aquò, las gents ne son de mai en mai conscientas, se pausan de questions e las nos pausan. Cercan de responsas e son totjorn interessadas per las qu’apòrta lo Partit de la Nacion Occitana. S’aderisson pas de tira a nòstras proposions, almens aquestas lors son ara conegudas e fan camin dins lor esperit. Son d’ont mai demandairas qu’ara per ara Lo Lugarn es la sola tribuna d’opinion politica presenta a l’Estivada.

            Coma pòt arribar a tota accion umana, comparada a las anterioras l’estivada 2021 es estada una tinada mejana. Pasmens i tornarem l’an que ven amb Lo Lugarn que lo PNO se tròba pertot ont es lo pòble occitan.

             La redaccion del Lugarn