Overblog
Editer l'article Suivre ce blog Administration + Créer mon blog

França es la risèia del monde

            Se coneis la pretencion dels Franceses : Impossible es pas francés ! Que dison ; Se sap tanben lor bavarditge : Lo francés es la pus polida e elaborada lenga del monde ! Qu’afortisson ; Se pòt pas passar a costat de lor cròia : França país de las Luses ! que pretendon ; Se pòt pas ignorar lor ufan : Los Aliscamps son la pus polida avenguda del monde ! Qu’assolidan ; Nimai lor vanitat : França, país dels dreches umans ! qu’asseguran. Et cetera desuntEt cetera desunt

Coma vo’n dobtatz, la tièra poiriá emplenar la pagina aquesta, emai d’autras. L’orgulh fa pèrdre lo cabiròl e rend fòl. Lor foliá nos valguèt doas guèrras mondialas per panar Alsàcia a Alemanha amb los milions e los milions de mòrts que generèron. Una ignominia qu’a la debuta del sègle passat vuegèt Occitània de sas fòrças vivas. Una foliá e una iniquitat que nos priva -pel moment- de nòstres dreches nacionals. Mas nos daissarem pas tòrcer !

            Los Franceses butan lors fastasmas de grandors e de poténcia fins al ridicul, sens se mainar, plan solide. Dins lors deliris supremacistas oblidan que son pas sols al monde. An de vesins que los observan e que sovent s’amusan de lors rasonaments e gesticulacions grostescas. Atal n’es que darrièrament, lo jornal alemand Die Zeit publiquèt a prepaus de França un article títolat « Autoritäres Absurdistan / Autoritari Absurdistan ». França país de l’absurde e de l’injustícia que i es inerenta ? Nosaus Occitans ne sabèm quicòm per n’avèm cada jorn la pròva.  

            Coma de just, nòstres amics alemands se son mainats sens aver a se forçar que demest las democracias europèas, cap autre país que França aviá pas engimbrat una estructura estatala tant opressiva e  tant autoritària. Pendent la pandemia de la covid-19, l’Estat francés aguèt la volontat pugnaça de bresar las libertats individualas de sos ciutadans. Alara que dins los autres Estats, per carrièras, la polícia demandava als ciutadans de cargar la masqueta, en França mai d’un milion de personas foguèron punidas d’una multa de 135 € per aver pas sus elas l’ausweis impausat pel poder parisenc.

            Dins lo meteis esperit ultra chauvinista e autoritari, al moment de l’èrsa primièra de la pandemia, alara qu’aquesta comencèt per s’espandir en Alsàcia, region que comptèt fòrces malauts, la vila e l’espital de Basilèa en Soïssa, que practicament tòca a Milhüsa, prepausèt a las autoritats medicalas d’Alsàcia de recebre de malauts. Mas lo poder de París, emai dins aquelas funèstas circonstàncias, refusèt la solidaritat inter-nacionalista dels Soïsses. Preferiguèt mobilizar d’avions e de trens per carrejar de malauts en Bretanha o a Bordèu. Un còp de mai nòstres amics soïsses, emai se la coneisson plan, comprenguèron pas la deplorabla centralizacion franchimanda. Comprenguèron pas tanpauc la mentalitat qu’a l’encòp ne davala e la noirís. Absurdistan fotralhèt un còp de mai. Puslèu que de carrejar de monde en reanimacion a 35 quilomètres, los Franceses, que se creson totjorn pus fòrts que los autres e mespresan la « pichona » Soïssa, los mandèron a de centenats de quilomètres, amb la risca d’agreujar lor estat. Siá dich en passant, al 27 d’octobre de 2020, la « pichona » Soïssa tan mespresada en debuta de pandemia per París (a fòrça França acceptèt son ajuda) comptava pas que 8,57 decèsses per million d’estatjants, mentre que França ne comptava 515. Las chifras se passan de comentaris. O França bailejèt lamentablament la marrana, o lo virus tenguèt compte de las frontièras. Benlèu coma o faguèron las nivols radioactivas de Chernobil ? Se lo sujècte èra pas tan grèu, n’i auriá per rire. Òc-ben, Absurdistan es la risèia del monde, mas los Absurdistaneses son plan tròp persuadits de lor superioritat per escotar los minus-habens e los farluquets.

            Son mai que los Europèus que se rison d’Absurdistan, Josef Schovanec, un jornalista de La Despacha de Tolosa, esita pas a denonciar dins l’edicion del dimenge 22 de novembre de 2020 del jornal : « Lo malaise francés, talament patent e sus las originas del qual tantes intellectuals parisencs barjacan vanament, ten un elefant dins la pèça : un Estat tròp centralizat, auturós, obès e despotic ». Es pas ieu que o escribi ! Atanben, me demandi se la luciditat del jornalista ven pas de son origina estrangièra. Josef Schovanec sembla el tanben, coma lo jornalista del Die Zeit, s’èsser mainat que viviá al país de l’absurditat. Manca pas de notar que, fòra Itàlia, al moment de la primièra èrsa pandemica, França es estat lo sol país al monde a exigir de sos ciutadans una atestacion de sortida per anar far sas crompas. Nòta condreitament que l’Ausweis es una mesura impensable dins las autras democracias. Es benlèu qu’aquela tissa de voler contrarotlar los anars e tornars de cada ciutadan fa partida de l’excepcion absurdistanesa (perdon francesa). Es pas vertat que lo ridicul tua pas ! Dins aquel cas tua las libertats individualas e collectivas.

                    Sèrgi Viaule

 

França es la risèia del monde

França es la risèia del monde

Tag(s) : #Tot en Oc, #Tribune libre, #Sèrgi-Viaule, #Covid-19
Partager cet article
Repost0
Pour être informé des derniers articles, inscrivez vous :