Overblog
Editer l'article Suivre ce blog Administration + Créer mon blog

La nacion occitana tornamai en dòl

 

            Fa qualques jorns perdèrem l’istorian Miquèl Ròcabèrt, d’uèi aprenèm la mòrt de Joan-Pau Verdièr avenguda dins la nuèit del dissabte 20 al dimenge 21 de junh de 2020. Amb la despartida del cantaire lemosin, la nacion occitana pèrd un de sos mai famoses poètas e musicians. Fa d’autant mai dòl que cada còp qu’Occitània pèrd un de sos enfants mai creatius, es lo país tot que s’apaurís culturalament. Joan-Pau Verdièr èra una votz singulara demest las voses de la nòva cançon occitana de las annadas setanta del sègle passat. Aviá una votz plan particulara, amb un timbre fòrça racassut e d’intonacions fèrmas.

            Malurosament, -un còp de mai per de rasons ideologicas injustificadas e sectàrias-, Joan-Pau Verdièr poguèt pas anar cotria lo demai del movement renaissentista cultural que flamejava tre l’aprèp mes de mai de seissanta-uèit. A n’aquel moment, cadun essent crispat sus çò que pensava èsser son prat barrat, l’exclusion èra de mesa. Pasmens las causas acabèron per s’arrengar e cadun foguèt plan obligat de reconéisser son immens engenh artistic. Mas lo mal èra fach e Joan-Pau Verdièr demorarà mai que tot acantonat en Peiregòrd. Una marginalizacion que nosèt al dardalh de la cultura occitana.

Foguèssem pas en situacion de colonizacion, lo cantaire auriá degut far una carrièra inter-nacionala de nivèl planetari. Atal la cultura mondiala auriá beneficiat de l’apòrt occitan, tan singular e doncas tant universal coma los autres. Ailàs, la cultura nòstra estant de longa escanada, avèm de contunh lo genolh francés sus la garganta que l’empacha de polsar, Joan-Pau Verdièr aurà pas agut d’autras possibilitats que de despartir sa creativitat amb lo sol pòble occitan.

               De cultura libertària, lo poèta-cantaire aguèt pas jamai l’èime ni la curiositat d’estudiar l’etnisme e lo nacionalisme democratic definit per Francés Fontan. La causa es pas pròpria a n’el. Son nombroses los intellectuals a èsser passats a costat del combat politic per la liberacion del país.

             Pasmens, retenèm de Joan-Pau Verdièr la fidelitat a sa cultura e sa volontat tenaça de la voler despartir amb lo pòble occitan. Amb sa despartida es un musician sensible e un estèta del vèrb occitan que se n’es anat. Foguèt un compositor de tria que va mancar dins lo cortal de la cançon occitana. Un mitan que malurosament, per encausa de l’interdiccion permanenta de se produsir dins los mèdias, tira mal per se renovelar. Amb la mòrt de Joan-Pau Verdièr es una votz encantarèla que s’es atudada. A nosaus de refusar l’estofament que l’opression nos vòl impausar en tornant prene e cantar las cançons de Joan-Pau Verdièr. Atal, amb el, longamai demorarem vius.

               Lo Partit de la Nacion Occitana se clina frairalament sus la memòria de Joan-Pau Verdièr. Presenta sas condoléncias esmòugudas a sos amics, son mond e sa familha. Totes amassa, contunhem lo combat sul camin de justícia e de libertat.

 

La redaccion del Lugarn

 

https://fr.wikipedia.org/wiki/Joan-Pau_Verdier

https://fr.wikipedia.org/wiki/F%C3%A9d%C3%A9ration_anarchiste-communiste_d%27Occitanie

https://www.youtube.com/watch?v=6kgxc0Ornvg

Despartida del cantaire lemosin Joan-Pau Verdier
Tag(s) : #Actualités, #Tot en Oc, #occitanie
Partager cet article
Repost0
Pour être informé des derniers articles, inscrivez vous :