L’abat Andrieu Mateu a defuntat

Necrologia

Andrieu Mateu

Éra nascut a Borlens, un vilatge situat entre Fumel e Tornon, en 1930, e èra estat ordenat prèire lo 29 de junh de 1956. Doctor en istòria e sciéncias umanas, èra estat nomenat director diocesenc de l’ensenhament catolic d’Òlt-e-Garona. Foguèt tanben pendent mantunas annadas president de la Societat de las Letras, delas Sciéncias e dels Arts d’Agen. Fasiá partida d’aquela còlha de prèires que refusan pas de presicar en lenga occitana. Sas omelias son pas estadas publicadas (1) mas s’ameritarián d’o èstre. Profeitèt de sa nominacion en tant que director del licèu Sant Caprasi d’Agen per favorizar l’ensenhament de l’occitan. Oblidèt jamai sa lenga mairala e ajudèt tant que podèt los occitanistas coma los felibres. Òme de fe, èra tanben avodat a la sciéncia a laquala faguèt lo don de son còrs. L’occitanisme saluda en Andrieu Mateu un de sos ardents defensors.

(1) L’autor d’aquest article ne detén una còpia

Cristian Rapin