Overblog
Editer l'article Suivre ce blog Administration + Créer mon blog

Çò que vòl lo
Partit de la Nacion Occitana
  • per la lenga e la cultura occitana,
  • per l'Occitània

Un estatut per nòstra lenga e nòstra cultura !

A l’ora d’ara, l’occitan en tant que lenga dicha regionala es considerat per la Constitucion de la Republica francesa coma fasent partida del patrimòni de França.

França signèt a minima, en 1999, la Carta europèa de las lengas regionalas e minoritàrias mas l’a pas encara ratificada. Lo President de la Republica a tornat afortir recentament son intencion d’o far en acampant en Congrès las doas Assembladas. La resulta d’aquel marchament, que jutjam util, es incerta e recusam en particular la « declaracion interpretativa » qu’empacha l’autreg de drechs collectius als Occitans e als autres pòbles de França. Una ratificacion assortida de las meteissas restriccions que la signatura de 1999 portariá res de mai que çò permèton ja las leis actualas.

- Lo Partit de la Nacion Occitana vòl una lei quadre que done un estatut de lenga oficiala a las lengas de França per perennizar lor usatge, crear las condicions de lor transmission e permetre lor socializacion e lor usatge sistematic dins la vida publica.

- Lo Parti de la Nacion Occitana vòl que las regions, las comunas e los departaments occitans, o parcialament occitans, menen de politicas lingüisticas ausardas per valorizar e promòure la lenga e la cultura occitana aital coma las autras lengas e culturas territorialas « minoritàrias » (basca e catalana). Aquelas politicas lingüisticas e culturalas de las collectivitats territorialas  deuràn èstre coordinadas per una institucion publica inter-regionala. A tèrme, envitam las collectivitats territorialas occitanas a se tornar definir en tenent compte de lor identitat occitana e de las identitats particularas dels païses d'Òc, e a se federar : aquela institucion inter-regionala constitüís una prefiguracion de la federacion a venir.

- Lo Partit de la Nacion Occitana vòl que aquelas regions, departaments e comunas creen e desvolopen de corses publics de lenga e cultura occitana pel mond bèl, afin de respondre a la demanda de la populacion e a las necessitats de la socializacion e de l'usatge public.

- Lo Partit de la Nacion Occitana vòl que la competéncia en matèria d'ensenhament siá devoluda a las regions ; per començar, aquela competéncia deu èstre partejada amb l'Estat que contunha de ne reivendicar lo monopòli.

L’occitan deu venir (coma lo còrse uèi) una matèria obligatòria (levat demanda parentala de derogacion) dins l'ensenhament escolar (escòla, collègi e licèu) e, l'ensenhament superior, la recèrca universitària e la formacion dels mèstres deuràn acompanhar aquela politica lingüistica escolara. Per començar, l'oferta d'ensenhament de l'occitan e aquela de l'ensenhament bilingüe en occitan deuràn èstre desvolopats per venir  accessibles a las familhas pertot sul territòri occitan ; los establiments d'ensenhament bilingües publics e associatius seràn encoratjats coma actors d'un servici public regional essencial, los ensenhaires del public devon poder adoptar la pedagogia immersiva e las collectivitats devon poder ajudar los establiments associatius, sens subir los interdits actuals. A tèrme l'ensenhament bilingüe immersiu deurà èstre generalizat tre l’escòla mairala.

- Lo Partit de la Nacion Occitana vòl que las regions occitanas favorizen l’integracion dels immigrats (Franceses e estatjants d’autres païses de l’Union europèa) en lor ofrissent de seguir de corses de francés, mas tanben d’occitan. A tèrme, aquelas regions  o lor federacion devon aver drech a la paraula dins la definicion d'una politica comunautària de l'immigracion per promòure una melhora integracion dels immigrats, respectuosa de nòstra identitat occitana.

Devon tanben encoratjar e ajudar los occitanofònes a transmetre la lenga, utilizar e remunerar lors competéncias dins lo dispositiu dels corses pel mond bèl o dins l'ensenhament escolar, valorizar (quitament pecuniarament) las familhas occitanofònas.

Un estatut per nòstre país !

- Lo Partit de la Nacion Occitana vòl de regions occitanas amb de poders espandits e los mejans necessaris a l'exercici d’aqueles poders. Aquelas regions seràn encara mai fòrtas se s’amassan.

Coma o mòstra l’exemple dels govèrns autonòms del Bascoat e de Catalonha dins l’Estat espanhòl, sols de poders politics fòrts son susceptibles de tornar a las lengas auctotònas la plaça que s’ameritan, la primièra. Mas, e mai l’autonomia poiriá èstre remesa en causa per un poder central coma, per exemple, lo poder espanhòl.

- Lo Partit de la Nacion Occitana vòl a tèrme mai long  un Estat occitan sobeiran, membre de l’Union europèa e de l’ONU que, sol, pòt assegurar una plaça predominanta (es a dire normala!) a l’occitan.

- Aquelas estapas las passarem pauc a cha pauc solament se sèm capables de convéncer a pòst los Occitans, nascuts en Occitània o venguts d’endacòm mai, e de pesar dins las consultas electoralas.

 

Lo Partit de la Nacion Occitana a Montpelhièr.

Lo Partit de la Nacion Occitana a Montpelhièr.

Tag(s) : #Tot en Oc
Partager cet article
Repost0
Pour être informé des derniers articles, inscrivez vous :