/image%2F0568858%2F20140111%2Fob_0348f4_logo-pno-jpg){kind=logo}
Comunicat
Demanda d’asil cultural a l’UNESCO
Lo dimècres 15 de mai passat a 11 oras, 150 a 200 representants de las lengas de França del Collectiu del 31 de mars jos la coordinacion de l’ELEN (Ret europèu per l’egalitat de las lengas) s’amassèron davant lo sèti de l’UNESCO a Paris per demandar l’asil cultural a aquela organizacion. A la demanda de l’ELEN, una delegacion i foguèt recebuda. L’Occitània i èra representada per Jean-François Laffont de Convergéncia occitana, Laurent Gosset de l’IEO, Jan-Marc Courbet del Felibritge e Guilhèm Latruvèrsa, conselhièr regional en Miègjorn Pirenèus. Sos membres justificaron la demanda d’asil pel refús del president de la Republica francesa, malgrat sa promessa, de metre a l’òrdre del jorn de la reforma constitucionala venenta la ratificacion de la Carta europèa de las lengas regionalas e minoritàrias e per l’abséncia gaireben totala de la lengas regionalas dins lo projècte de lei sus la refondacion de l’escòla del ministre de l’Educacion nacionala. Demandèron a l’UNESCO d’escriure al president Hollande per l’incitar a respectar la diversitat lingüistica en França en bailant un estatut legal a las lengas de França. Lo Partit de la Nacion Occitana sosten a fons aquela iniciativa. Pasmens, pensa que la question lingüistica es estrechament ligada a la question de la reforma territoriala. De regions autonòmes amb de poders espandits dins una republica federala poirián, dins un primièr temps, menar de politicas cap a la reconquista e a la resocializacion de las lengas de França en esperant que los pòbles de França mestrejen lor avenir lingüistic mas tanben economic e social.
17 de mai
Partit de la Nacion Occitana
10 carrièra de Romàs
F-47000 Agen (Occitània per França)
Telefonet : 06 76 47 32 12
Lo Partit de la Nacion Occitana sosten a fons aquela iniciativa.