Lo CPJ ditz pas jamai per quines mèdias trabalhavan aquelas dètz e sèt personas empresonats

Lo Comitat per la Proteccion dels Jornalistas o CPJ (en anglés : Committee to Protect Journalists) es una associacion a tòca non lucrativa fondada en 1981. Es basada als Estats Units d’America e a per objècte « d'observar los abuses contra la premsa e promòure la libertat de la premsa a travèrs lo monde ».

Malurosament aquel organisme fa coma se la possibilitat per una espia o un terrorista de s’amagar darrèr una carta de premsa, existissiá pas. Cal èsser plan ninòi o préner las gents per d’arganhòls per voler far créire que totes los detenguts que de per lo monde an una carta de premsa son de jornalistas vertadièrs, socitoses de la libertat d’informacion e d’opinion. Quina melhora cobèrtura que la del jornalisme per permetre a un terrorista o una espia de se desplaçar dins d’endreches sensibles ?

Aquò basta d’aver una carta de premsa dins la pòcha per èsser vertadièrament jornalista ? Lo Comitat per la Proteccion dels Jornalistas sembla se pausar pas jamai la question. A qué se fisa per definir qual es jornalista e qual o es pas ? A la sola possession d’una carta de jornalista ? Aquela entitat CPJ pareis èsser pas seriosa. Pas aver besonh d’aver fach una escòla d’espionatge per saber que lo jornalisme, amb lo domèni dels afars comercials, lo de las Organizacions Non Governamentalas, lo de la diplomacia e qualques autres, son de nises d’espias. Aquela practica es coneguda de totes los observators politics, mas sembla desconeguda d’aquel escur Comitat per la Proteccion dels Jornalistas. A créire qu’el tanben es una cobèrtura per de monde que trabalhan del dedins a la destabilizacion de las democracias. Trabalhariá per qual e al servici de qual ? China ? Russia ? Monarquias e dictaturas islamistas ? Las possibilitats son nombrosas, mas a legir son rapòrt annadièr per 2023, sas interpretacions factualas e los amalgamas que conten, es evident que trabalha pas que relativament al servici dels drechs umans, de la libertat e de la democracia.

            Ça que la, lo CPJ reconeis un moment donat que dins d’unes cases l’arrestacion de falses jornalistas pòt èsser justificada. Ajusta que, d’efièch, li es impossible de poder examinar d’un biais independent cada afar. Tant valiá que foguèsse dich se voliá evitar lo descrèdit complet als uèlhs d’observators impartials. Pr’amor que justament es aquela imparcialitat que fa fraita a un comitat que fa tot per se balhar l’aparéncia de l’aver, mas qu’engana pas que los que se vòlon plan daissar enganar.

            Aquel CPJ met sul meteis nivèl los jornalistas de Hongkong, empresonats per aparar l’estatut democratic de la vila amb los terroristas del Hamas e del Jihad islamic amagats en jornalistas e que son pas que de propagandistas antisemitas. Fa pas la diferéncia entre los dos, pòt pas èsser una error de la part del CPJ. I a d’evidéncia aquí darrèr una volontat de nòser a Israèl e, per raspalheta, al monde democratic. Lo moment es vengut de remembrar a n’aquelas gents qu’Israèl es la sola democracia de l’Orient mejan. Lo sol Estat que garantisca los drechs umans, quitament en plena agression racista pels islamistas.

            Es tanben evident que sens la guèrra facha pels islamistas a Israèl i auriá pas d’uèi 17 sembla-jornalistas dins las presons israelianas. Lo quiti CPJ es obligat de reconéisser qu’en 2022, valent a dire abans lo chaple barbar del 7 d’octobre de 2023, i aviá pas qu’un sol « jornalista » dins las jaulas de l’Estat israelian. Mas de la declaracion de guèrra a Israèl per los terroristas islamistas, d’alhors instrumentalizats per la teocracia d’Iran, lo CPJ ne parla pas. Fa coma se al kibbotz Be’eri d’enfants èran pas estat assassinats dins de condicions inumanas e se de femnas èran pas estadas violadas abans d’èsser estadas mutiladas puèi assassinadas. Tot aquò me fa dire qu’aquel rapòrt revèrta la propaganda per banalizar las orrors comesas pel terrorisme islamic.

            Lo pièger es quand lo CPJ compara los 17 jornalistas detenguts en Iran amb los 17 sembla-jornalistas -mas potencialament vertadièrs terroristas- detenguts en Israèl. Los jornalistas iranians son de monde qu’ensajan de trabalhar al dintre d’una dictatura per informar al melhor de çò que s’i passa. Los sembla-jornalistas arrestats en Israèl son segurament de militants islamistas que trabalhan per la destruccion de l’Estat d’Israèl. Atanben, l’Estat d’Israèl a de se n’aparar. Es per el una condicion existenciala. Israèl a pas arrestat totes los Palestinians que se passejan amb una carta de jornalista dins lor pòcha. Aquestes devon èsser nombroses. Los 17 empresonats o son pas estat per azard. Los Servicis israelians de seguretat son pas acostumats a trabalhar a vista de nas.

            D’alhors lo famós CPJ es obligat de reconéisser que totes los sembla-jornalistas empresonats en Israèl son totes palestinians e son estat arrestats aprèp l’afrós chaple del 7 d’octobre de 2023. Se denombra pas dins las presons israelianas un sol jornalista israelian, o american, o african o europèu o vengut d’endacòm mai. Cercatz l’error ! Es quasi evident qu’aquelas personas detengudas, emai se lor procès s’es pas encara tengut e se cap de senténcia es pas encara estada prononciada, rensenhavan al minima las organizacions terroristas, e de fach ne fan partida. Tornèm o dire, Israèl a lo drech de se defendre, emai contra sos enemics qu’an pres la precaucion de s’aplejar d’una carta de premsa per far créire als ravis del CPJ que son de professionals. D’alhors lo CPJ ditz pas jamai per quines mèdias trabalhavan aquelas dètz e sèt personas. Trabalhavan per las televisions del Hamas o del Jihad islamic s’aquestas organizacions terroristas n’an una ? Çò qu’aquò passariá l’òsca ! Trabalhavan per los jornals escrichs d’aquelas doas milicias terroristas ? De fach, o sabèm pas que lo CPJ o vòl pas dire, o pièger encara o sap pas. Mas pel CPJ qu’aqueles sembla-jornalistas sián en preson aquò basta per far l’amalgama entre Israèl, Iran, China, Egipta, etc... Los democratas occitans e los del monde entièr apreciaràn lo manipòli.

            Tot sabent que las gents sabon legir, lo rapòrt s’acaba ça que la per demandar a Israèl de far la demonstracion que las personas arrestadas representan un perilh vertadièr per la seguretat de l’Estat israelian. Alavetz, acaban a mièg mots per admetre que i a plan una possibilitat qu’aquelas personas foguèsson de terroristas e pas de jornalistas. Tan val èsser tardièrament admes que non jamai…

                Sèrgi Viaule