Occitanie. Lo Lugarn 141 est en ligne

Quau entènd la revendicacioun óucitano ? Taravela pendènt dous an pèr la pandemìo de Covid-19 – à tau poun qu’an neglegi la situacioun dicho « naciounalo » e internaciounalo –, li media francés soun aro boustiga pèr l’Ukraino e la situacioun geoupoulitico moundialo que dèvon bèn segur relata, mai sènso óublida la situacioun de l’Estat francés e mai que mai la nostro.

Inevitablamen, acò court-circuito la campagno pèr lis eleicioun presidencialo venènto.

Quent es lou bilans de Macron, candidat à sa reeleicioun, en matèri de lengo e culturo dicho regiounalo ?

Tenguè deguno de si proumesso e manifèsto un desinterès mespresous pèr la questioun.

La lèi Molac fuguè adóutado pèr lou parlamen mau-grat l’óupousicioun de soun menistre Jean-Michel Blanquer i lengo dicho regiounalo e mai que mai à soun ensignamen inmersiéu.

L’ensignamen pèr inmersioun fuguè pièi declara incoustituciounau pèr lou Counsèu coustituciounau, sesi pèr de deputa manipula pèr Blanquer.

Lou gouvèr de Jean Castex s’acountentè de desaprouva lou Counsèu en faguènt assaupre que l’ensignamen inmersiéu èro poussible, mai la reformo Blanquer di licèu avié ja garça uno patacado dóu calibre gros à l’ensignamen di lengo « regiounalo » messo en concurrènci emé li lengo estrangiero reputado mai utilo e li lengo anciano, valourisado au noum d’uno councepcioun eleitisto de la « culturo ».

En matèri d’ameinajamen e de gouvernanço dóu territòri, la Franço es toujour tant jacoubino, coume lou mostro sa gestioun centralisado e autouritàri de la pandemìo. Macron a ges simplifica la milo-fueio amenistrativo, a pas councedi de coumpetènci nouvello i couleitiveta territourialo, a blouca li revendicacioun d’autounoumìo de la Coursego vo de recouneissènço d’uno identita alsaciano, a refusa de repourta lou referendum d’autoudeterminacioun en Novo-Caledounìo mau-grat la demando dis independentisto canaque, pèr prouvouca soun bouicoutage d’aquéu referendum e, ansin, lou mantenemen de la Canaquìo dins l’encastre de l’Empèri francés.

Lou Partit de la Nacioun Óucitano pòu pas faire autramen que de rejita lou candidat Macron. Pèr quant is àutri candidat, mai jacoubin que iéu, podes mouri ! Pas un mot dins lis acamp e li prougramo sus l’aparamen e la proumoucioun de la diversita lenguistico, vo soun-que pèr la refusa, coume Mélenchon e Zemmour. Poudèn metre à despart Jouan Lassalo, regiounalisto assumi, e lou candidat ecoulougisto Yannick Jadot, mai an deguno escasènço d’arriba au segound tour e d’èstre elegi.

Li regioun, despartamen, coumunauta de coumuno e coumuno an segur la poussibleta de mena de poulitico lenguistico mai o mens ardido en favour di lengo de Franço, mai acò depènd coumpletamen de sa bono voulounta, que se manifèsto subre-tout quouro es empurado pèr l’acioun militanto dis assouciacioun culturalo – e enjusquo pèr de mouvamen pouliti propre.

Pamens, en despié de la reticènci à l’aceta de la part di militant que volon se limita à la culturo, se trato bèn, pèr lou Partit de la Nacioun Óucitano, d’uno lucho poulitico que fau mena pèr la lengo, la culturo e au plus pau l’autounoumìo, pas soulamen en destribuissènt de papeiret sus li mercat, en publicant de coumunica e en intervenènt sus li maiun souciau, mai en participant à tóuti lis eleicioun poussiblo emé coume toco à long terme de counquista lou poudé en Óucitanìo.

Dins aquéu sèns, la creacioun en janvié passa de la FPU (Federacioun di Païs Uni) dèu permetre de mutualisa li mejan e d’assaja de presenta 150 candidat is eleicioun legislativo de jun, emé uno meiouro vesibleta que la pougnado de candidaturo councedido fin-qu’aro pèr quàuqui partit francés à si satelite « regiounalisto ».

Lou Partit de la Nacioun Óucitano saludo aquelo demarcho coustrutivo e duberto, comto bèn se i’assoucia mai s’esbrihaudo pas. Es pau proubable d’avé d’elegi mai ço que comto es de prendre dato e de prepara l’avenidou.

Lou mouvamen pouliti óucitan, que siegue regiounalisto, autounoumisto vo independentisto, es pau representatiéu e divisa. Subre-tout, patis de l’envieiimen de si cadre. La relèvo es uno necessita vitalo e poudra veni que de la jouventuro. Pèr lou moumen, l’Óucitanìo fai pas partido di causo que desiro s’aproupria, encaro que siegue bonodi li jouine qu’uno regioun óucitano centralo se dis Óucitanìo.

Es verai que i’a uno servo dins li « calandreto » e li classo bilengo de l’ensignamen publi. Li futur militant óucitan podon sourti d’aquelo servo, mai fau amira mai ample e prepausa à touto la jouventuro d’óujeitiéu e de formo d’acioun que li courrespondon mai qu’aquéli di mouvamen pouliti classi e que siegon un ressoun de si preóucupacioun pèr lou desreglamen climati e pèr la bioudiversita. Aquelo eisigènci de diversita regardo pas soulamen lis espèci mai tambèn li culturo de l’umanita e si lengo.

Voulèn que la nacioun óucitano ague un avenidou mau-grat de siècle de martelage de cervèu pèr assimila lis Óucitan e n’en faire de Francés de souto-categourìo – coume, pèr eisèmple, lis emperialisme russe e espagnòu an travaia e travaion encaro pèr tremuda lis Ukrainen e li Catalan en Russe e en Espagnòu de souto-categourìo.

Acò depènd mai que mai, mai pas esclusivamen, de la jouventuro óucitano que dèu, de soun biais, countunia la batèsto pèr l’emancipacioun de la nacioun óucitano menado e amplificado pèr sis eina despièi lis annado seissanto dóu siècle passa. Aquéli an pas desmerita mai aro, es vengu lou tèms de passa lou testimòni.

Coume l’escrivié Francés Fountan en 1960 dins lou preambule de soun obro foundadouiro d’aquel envanc, « Etnisme, devers un naciounalisme umanisto » :

« À la jouventuro d’Óucitanìo pèr fin que, pèr lou proumié cop despièi sèt cènts an, ause tourna-mai s’afierma pèr ço qu’es. » Basto que soun vot devèngue realita !